তৃণমূল কংগ্ৰেছক শক্তিশালী কৰাৰ লক্ষ্য লৈ আজি অসমলৈ আহিব অগ্নিকন্যা মমতা দিদি

ডিজিটেল ডেস্ক: আজি অসমলৈ আহিব পশ্চিমবংগৰ মুখ্যমন্ত্ৰী মমতা বেনাৰ্জী। দেশৰ অন্য ৰাজ্যতো তৃণমূল কংগ্ৰেছ তথা নিজৰ শক্তিশালী ৰূপ বিস্তাৰ কৰাৰ পৰিকল্পনাৰে অসম ভ্ৰমণলৈ আহিব অগ্নিকন্যা মমতা। পশ্চিমবংগত 'দিদি' নামেৰে জনপ্ৰিয় মমতা বেনাৰ্জীক লৈ বহুলোকে সপোন দেখিছে যে ‘দেশৰ ভৱিষ্যতৰ প্ৰধানমন্ত্ৰী মমতা বেনাৰ্জী । সেয়ে পশ্চিমবংগতেই নহয় সমগ্ৰ দেশতে দলৰ প্ৰভাৱ বিস্তাৰ কৰিবলৈ অসমলৈ আহিব বংগৰ দিদি মমতা বেনাৰ্জী।

পশ্চিম বংগৰ লগতে দেশৰ ৰাজনৈতিক পথাৰত ক্ৰমান্বয়ে অধিক সক্ৰিয় হৈ পৰিছে মমতা দিদি। দ্বিতীয়বাৰলৈ পশ্চিমবংগত মুখ্যমন্ত্ৰীৰ আসন দখল কৰাৰ পিছতে অন্যান্য ৰাজ্যতো তৃণমূল কংগ্ৰেছৰ ভেটি সুদৃশ কৰিবলৈ সংকল্পবদ্ধ পশ্চিমবংগৰ মুখ্যমন্ত্ৰীগৰাকী। ইতিমধ্যে ত্ৰিপুৰাত শক্তিশালী ৰূপত অৱস্থান কৰিছে তৃণমূল কংগ্ৰেছে। সমগ্ৰ দেশতে প্ৰভাৱ বিস্তাৰ কৰা এইগৰাকী নেত্ৰীক আনকি প্ৰধানমন্ত্ৰীয়েও সমীহ কৰি চলা দেখিবলৈ পোৱা যায়৷ পশ্চিমবংগৰ আঞ্চলিক দল তৃণমূল কংগ্ৰেছৰ সুদৃঢ় ভেটি আৰু ৰাজ্যখনৰ স্বাৰ্থত বেনাৰ্জীৰ আপোচবিহীন স্থিতিৰ বাবেই পশ্চিমবংগত খোপনি পুতিব পৰা নাই বিজেপিয়ে৷

তৃণমূল কংগ্ৰেছক শক্তিশালী কৰাৰ লক্ষ্য লৈয়ে আজি ২১ ডিচেম্বৰ মঙলবাৰে গুৱাহাটী উপস্থিত হ’ব মমতা বেনাৰ্জী। দৰ্শন কৰিব কামাখ্যা মন্দিৰ। তাৰ পিছতে দলীয় নেতৃত্বৰ সৈতে এখন বৈঠকতো মিলিত হোৱাৰ কথা পশ্চিমবংগৰ মুখ্যমন্ত্ৰীগৰাকীৰ। মমতা বেনাৰ্জীৰ অসম ভ্ৰমণে অসমৰ ৰাজনৈতিক পট পৰিৱৰ্তনৰ ইংগিত বহন কৰিছে৷