আপুনি থাইৰয়ডৰ সমস্যাত ভুগি আছে নেকি? গ্ৰহণ কৰক এইকেইটা যাদুকৰী খাদ্য

ডিজিটেল ডেস্ক: আমাৰ ডিঙিৰ আগফালে থকা পখিলা আকৃতিৰ গ্ৰন্থিটোক থাইৰয়ড বোলা হয়। এই গ্ৰন্থিবোৰে নিঃসৰণ কৰা থাইৰয়ড হৰম’নে মানুহৰ বৃদ্ধি, বিকাশ, শাৰীৰিক আৰু বিপাকীয় প্ৰক্ৰিয়াত গুৰুত্বপূৰ্ণ ভূমিকা পালন কৰে। যেতিয়া এজন ব্যক্তিৰ থাইৰয়ডে এই গুৰুত্বপূৰ্ণ হৰম’নবোৰ কম বা বেছিকৈ প্ৰস্তুত কৰে, তেতিয়াই এজন ব্যক্তি থাইৰয়ডৰ সমস্যাত আক্ৰান্ত হয়।

হাইপোথাইৰয়ডিজম, থাইৰয়ডাইটিছ আৰু হাছিম’ট’ছ থাইৰয়ডাইটিছ আদি বিভিন্ন ধৰণৰ থাইৰয়ড ৰোগত কোনো ব্যক্তি আক্ৰান্ত হোৱা দেখা যায়। আজিকালি এই থাইৰয়ড ৰোগৰ প্ৰাদুৰ্ভাৱ অত্যধিক হৈ পৰা পৰিলক্ষিত হৈছে। থাইৰয়ডত আক্ৰান্ত ৰোগীৰ আন বহুতো লক্ষণৰ লগতে ভাগৰুৱা, চুলি সৰা, ওজন বৃদ্ধি, ঠাণ্ডা অনুভৱ কৰা, নিৰাশ অনুভৱ কৰা আদি সমস্যাত ভুগি থাকে। থাইৰয়ডে বিশ্বৰ ১-২% লোকক আক্ৰান্ত কৰে আৰু পুৰুষতকৈ মহিলাৰ ক্ষেত্ৰত আক্ৰান্তৰ পৰিমাণ ১০গুণ বেছি৷

কেৱল খাদ্যই থাইৰয়ডে নিৰাময় কৰিব নোৱাৰে। কিন্তু সঠিক পুষ্টিকৰ উপাদান আৰু ঔষধৰ সংমিশ্ৰণে থাইৰয়ডৰ কাৰ্যক্ষমতা পুনৰুদ্ধাৰ কৰাত সহায় কৰিব পাৰে আৰু লক্ষণসমূহো কম কৰিব পাৰে।

কোনবোৰ খাদ্য থাইৰয়ডৰ বাবে উত্তম জানো আহক--

১) শাক-পাচলি খাব লাগে: প্ৰতিদিনে এবাতি সিজোৱা শাক-পাচলি খাব লাগে। সেউজীয়া শাক-পাচলিত কেলচিয়াম, এন্টি-অক্সিডেন্ট, খনিজ আদি একাধিক মৌল থাকে। তদুপৰি প্ৰতিদিনে ১ বজাত বতৰৰ ফল খালে হৰম’নৰ মাত্ৰা ঠিক হৈ থাকে যাৰ ফলত থাইৰয়ডো নিয়ন্ত্ৰণত থাকে।

২) আলমণ্ডত চেলেনিয়াম নামৰ এবিধ পদাৰ্থ থাকে, যিটো এবিধ উপকাৰী প্ৰ’টিন। সেয়েহে থাইৰয়ড ৰোগীয়ে দিনটোত এমুঠি বাদাম খালে থাইৰয়ড গ্ৰন্থি উন্নীত হয়৷

৩) দিনটোত এটাকৈ কণী খাব লাগে। ইয়াত টাইৰ’চিন, আয়’ডিন আৰু চেলেনিয়াম থাকে, যিয়ে থাইৰয়ড হ্ৰাস কৰে।

৪) বগা ভাতৰ সলনি ব্ৰাউন ৰাইচ খাব লাগে। ইয়াত কাৰ্ব’হাইড্ৰেট থাকে, যিয়ে থাইৰয়ডৰ সমস্যা দূৰ কৰাত সহায় কৰে৷

৫) থাইৰয়ড ৰোগীৰ বাবে ওমেগা থ্ৰি ফেটি এচিড অতি প্ৰয়োজনীয়।  গতিকে ছালমন মাছ খাব লাগে। আন যিকোনো সাগৰীয় মাছো খাব পাৰি।