ডিজিটেল ডেস্ক: তিনিচুকীয়া জিলাৰ মাকুমত Artificial Intelligence চমুকৈ AI প্ৰযুক্তিৰ অপব্যৱহাৰৰ জৰিয়তে সংঘটিত হোৱা এক চাঞ্চল্যকৰ ঘটনা পোহৰলৈ আহিছে।
এগৰাকী যুৱতীৰ অশ্লীল ভিডিঅ’ ভাইৰেল কৰাৰ ভাবুকি দি ব্লেকমেইল কৰিছিল পশ্চিমবংগৰ গোপালপুৰ উত্তৰপাৰাৰ ৰঞ্জিত সিং নামৰ এজন যুৱকে। আৰক্ষীয়ে গ্ৰেপ্তাৰ কৰিবলৈ সক্ষম হৈছে ৰঞ্জিত সিঙক।
জানিব পৰা মতে, কিছু মাহৰ পূৰ্বে ফেচবুক আৰু ইনষ্টাগ্ৰামৰ জৰিয়তে অভিযুক্ত ৰঞ্জিত সিং আৰু মাকুমৰ এগৰাকী যুৱতীৰ মাজত চিনাকী হয়। পৰৱৰ্তী সময়ত যুৱতীগৰাকীৰ বিয়া ঠিক হোৱাত অসন্তুষ্ট হৈ যুৱকজনে সামাজিক মাধ্যমৰ পৰা যুৱতীগৰাকীৰ ফটো সংগ্ৰহ কৰি AI প্ৰযুক্তিৰ সহায়ত অশ্লীল ভিডিঅ’ নিৰ্মাণ কৰে। সেই ভিডিঅ’ ভাইৰেল কৰাৰ ভাবুকি প্ৰদান কৰি যুৱতীগৰাকীক ব্লেকমেইল কৰিবলৈ আৰম্ভ কৰে।
ফলস্বৰূপে যুৱতীগৰাকী মানসিকভাৱে ভাঙি পৰে। পৰিয়ালৰ লোকসকলে বিষয়টো অৱগত হোৱাত মাকুম আৰক্ষী থানাত এজাহাৰ দাখিল কৰে। অভিযোগ লাভ কৰাৰ লগে লগে আৰক্ষীয়ে তদন্ত আৰম্ভ কৰে।
উপ আৰক্ষী পৰিদৰ্শক বিতু শইকীয়াৰ নেতৃত্বত আৰক্ষীৰ এটা দলে কলিকতালৈ গৈ অভিযান চলাই অভিযুক্ত যুৱকজনক আটক কৰে। তদন্ত সম্পূৰ্ণ হোৱাৰ পাছত অভিযুক্তক ন্যায়ালয়ত হাজিৰ কৰাই জে’ল হাজোতলৈ প্ৰেৰণ কৰে।
Continue Reading
