‘দীৰ্ঘা চয়েল’ বনাঞ্চললৈ ভয়াৱহ ভাবুকি, লখিমপুৰৰ দীৰ্ঘা মাজগাঁৱৰ বনানীকৰণ ভূমিত অবৈধ নির্মাণকার্য

ডিজিটেল ডেস্ক : লখিমপুৰ জিলাৰ কদম ৰাজহ চক্ৰ এলেকাৰ বগীনদী থানাৰ অন্তৰ্গত দীর্ঘা মাজগাঁৱত ১৯৯৫-৯৬ বৰ্ষত লখিমপুৰৰ ভূমি সংৰক্ষণ বিভাগে (Soil Conservation Department) দীর্ঘা নদীৰ প্ৰবল গৰাখহনীয়া প্ৰতিৰোধ কৰাৰ সমান্তৰালকৈ দীর্ঘা নদীৰ প্ৰভাৱৰ পৰা কাষৰীয়া অঞ্চলসমূহক ৰক্ষা কৰাৰ প্ৰাথমিক উদ্দেশ্যে চাৰি হেক্টৰ ভূমি বনানীকৰণ ভূমিলৈ ৰূপান্তৰিত কৰি গছপুলি ৰোপণ কৰিছিল। অঞ্চলভিত্তিত সেই বনাঞ্চলক বর্তমান 'দীর্ঘা চয়েল' নামেৰে জনা যায়। 

দীর্ঘা নদীৰ কাষৰ অনুপযোগী ভূমি (Waste land)ক বনাঞ্চললৈ ৰূপান্তৰিত কৰাৰ ফল স্থানীয় অঞ্চলৰ কৃষিভূমি সুৰক্ষিত কৰাত প্রকল্পটোৱে গুৰুত্বপূৰ্ণ ভূমিকা পালন কৰিছিল। কিন্তু দুর্ভাগ্যৰ কথা যে লখিমপুৰ বন বিভাগ আৰু লখিমপুৰ ভূমি সংৰক্ষণ বিভাগৰ চূড়ান্ত অৱহেলাৰ বাবে বনাঞ্চলখনলৈ ভয়াৱহ ভাবুকি আহি পৰিছে। বনানীকৰণৰ ভূমিত বর্তমান অবৈধভাৱে পকী খুঁটাৰ নির্মাণকার্য চলি থকাৰ লগতে অঞ্চলটোত দ্রুতগতিত গছ নাইকিয়া হৈ আহিছে।

এনে কাৰ্যই বছৰ বছৰ ধৰি চলি অহা ভাৰত চৰকাৰৰ বনানীকৰণ ভূমি সংৰক্ষণৰ প্ৰচেষ্টাক অৱহেলা কৰাই নহয়, বৰঞ্চ বাৰিষা কালত গৰাখহনীয়া আৰু পৰিৱেশৰ প্ৰতি ভাবুকি আহিব বুলি স্থানীয় বাসিন্দাসকলে আশংকা প্রকাশ কৰিছে। অঞ্চলবাসীৰ মতে যদিহে এনে কার্যকলাপ নিয়ন্ত্রণহীনভাৱে চলি থাকে তেন্তে বনানীকৰণৰ ভূমি অৱক্ষয় হ'ব পাৰে। অঞ্চলবাসীয়ে এই ক্ষেত্রত সংশ্লিষ্ট কর্তৃপক্ষক অবৈধভাৱে গছ কটা আৰু ব্যাৱসায়িকভাৱে চলি থকা নির্মাণকার্য বন্ধ কৰিবলৈ আহ্বান জনাইছে। 

তদুপৰি গৰাখহনীয়া প্ৰতিৰোধৰ বাবে সেই বনানীকৰণৰ ভূমিত পুনৰ গছপুলি ৰোপণ কৰিবৰ বাবে ৰাইজে অনুৰোধ জনাইছে। স্থানীয় পৰিৱেশবিদ আৰু লোকসকলে মত প্রকাশ কৰিছে যে বনানীকৰণ ভূমিৰ গছ-গছনি সংৰক্ষণ কৰাটো পৰিৱেশ ভাৰসাম্যৰ উপৰি গৰাখহনীয়া প্ৰতিৰোধৰ বাবে অত্যন্ত গুৰুত্বপূর্ণ। তদুপৰি, M.C. Mehta বনাম Union of India (1987) গোচৰত মহামান্য উচ্চতম ন্যায়ালয়ে 'সুস্থ বাতাৱৰণ আৰু পৰিৱেশ'ক নাগৰিকৰ মৌলিক অধিকাৰ হিচাপে বিবেচনা কৰি ২১নং অনুচ্ছেদত ইয়াক ব্যাখ্যা (Interpret) কৰি আহিছে। সেয়ে ৰাইজে সুস্থ পৰিৱেশৰ ভাৰসাম্য ৰক্ষা কৰিবলৈ কর্তৃপক্ষক অনুৰোধ জনাইছে।

উৎসঃ দৈনিক জনমভূমি