ডিজিটেল ডেস্কঃ আৰু কিমান তললৈ যাব? আপোনাৰ কোনো লাজ নাই? এনেদৰেই প্ৰধানমন্ত্ৰী নৰেন্দ্ৰ মোদীয়ে নীতিশ কুমাৰক মহিলাৰ বিৰুদ্ধে অপমানজনক মন্তব্য কৰাৰ বাবে সমালোচনা কৰিলে। মধ্য প্ৰদেশত নিৰ্বাচনী প্ৰচাৰ চলোৱাৰ সময়তে মোদীয়ে কয় যে ইণ্ডিয়া এলায়েন্সৰ এজন গুৰুত্বপূৰ্ণ নেতাই বিধানসভাত থিয় হৈ মহিলাৰ বিৰুদ্ধে অশালীন মন্তব্য কৰি আছে। কিন্তু ভাৰত মিত্ৰজোঁটৰ কোনো নেতাই এই মন্তব্যৰ বিৰুদ্ধে মাত মাতিব পৰা নাই। মোদীয়ে বিহাৰৰ মুখ্যমন্ত্ৰীক প্ৰশ্ন কৰে, "আপুনি কিমান তললৈ নামিব পাৰে?"
প্ৰধানমন্ত্ৰীয়ে বুধবাৰে মধ্য প্ৰদেশত নিৰ্বাচনী প্ৰচাৰ চলায়। মোদীয়ে কয় "ইণ্ডিয়া মিত্ৰজোঁটৰ গুৰুত্বপূৰ্ণ নেতাসকলে ৰাজ্যিক বিধানসভাত থিয় হৈ মহিলাৰ বিৰুদ্ধে অশালীন মন্তব্য কৰিছে। অহংকাৰী মিত্ৰতাত কাৰো যেন কোনো লাজ নাই। ইণ্ডিয়া এলায়েন্সৰ এজনো নেতাই এই মন্তব্যক গৰিহণা দিয়া নাই। যিসকলৰ মহিলাৰ বিৰুদ্ধে এনে মানসিকতা আছে তেওঁলোকে আপোনাৰ উন্নতি কৰিব পাৰিবনে? আমাৰ মাতৃ আৰু ভগ্নীসকলৰ প্ৰতি এনে ধৰণৰ মনোভাৱ প্ৰকৃততে দেশক অপমান কৰাৰ সমান। ?"
উল্লেখ্য বিহাৰৰ মুখ্যমন্ত্ৰীয়ে জনসংখ্যা নিয়ন্ত্ৰণত মহিলাৰ শিক্ষা আৰু ভূমিকাৰ বিষয়ে ক’বলৈ গৈ বিতৰ্কিত মন্তব্য কৰিছিল। তেওঁ বিধানসভাত কৈছিল, "পুৰুষসকলে প্ৰতি নিশা এয়া কৰে আৰু তেতিয়াই অধিক কেঁচুৱা জন্ম হয়। কিন্তু যদি ছোৱালীবোৰে অধ্যয়ন কৰে তেওঁলোকে এই বিষয়ত সচেতন হ’ব পাৰিব... ’’। নীতিশে দাবী কৰিছিল যে তেওঁ মহিলাসকলৰ বাবে যৌন শিক্ষাৰ প্ৰয়োজনীয়তাৰ বিষয়ে ক’ব বিচাৰিছিল।
নীতিশ কুমাৰৰ এনে মন্তব্যৰ পিছতে তীব্ৰ বিতৰ্ক হৈছিল। বিৰোধী বিধায়কসকলে বিহাৰ বিধানসভাত প্ৰতিবাদ সাব্যস্ত কৰিছিল। বিৰোধীৰ হেঁচাত নীতিশে ক্ষমা বিচাৰিবলৈ বাধ্য হৈছে। তেওঁ বুধবাৰে কয় , "মই যি কৈছিলো সেয়া প্ৰত্যাহাৰ কৰিছো। মোৰ কথাৰ ভুল ব্যাখ্যা কৰা হৈছে। মই মহিলাৰ যৌন শিক্ষাৰ বিষয়ে কথা পাতি আছিলো। কিন্তু মোৰ কথাবোৰে কাৰোবাক আঘাত কৰিছে যদি মই ক্ষমা বিচাৰিছো। "
Continue Reading
