ডিজিটেল ডেস্কঃ ক্ৰিকেট খেলত আউট হোৱাৰ ক্ষোভ সহ্য কৰিব নোৱাৰিলে ১৭ বছৰীয়া বেটছমেনে। খঙত ১৪ বছৰীয়া বলাৰৰ ডিঙিত চেপি ধৰিলে। খেলপথাৰতে মৃত্যু হয় কিশোৰ বলাৰৰ। কানপুৰৰ সমীপৰ ঘটামপুৰ অঞ্চলৰ ৰহটি ডেৰা গাঁৱত সংঘটিত হৈছে এই ঘটনা।
সোমবাৰে স্থানীয় ক্ৰিকেট খেলৰ সময়ত সংঘটিত হয় এই মৰ্মান্তিক ঘটনা। আৰক্ষীৰ তথ্য অনুসৰি আউট হোৱাৰ পাছতো ক্ৰীজ এৰি যাবলৈ মন নগ’ল বেটাৰৰ। তাৰ পৰিৱৰ্তে বলাৰৰ লগত কাজিয়া কৰিলে। পিছত দুয়োৰে মাজত কাজিয়া হয়। ১৪ বছৰীয়া বলাৰক গুৰুতৰভাৱে প্ৰহাৰ কৰে অভিযুক্তই৷
বলিং কৰা ১৪ বছৰীয়া কিশোৰজনক গুৰুতৰভাৱে আঘাতপ্ৰাপ্ত হোৱাৰ পাছত স্থানীয় চিকিৎসালয়লৈ লৈ যোৱাত চিকিৎসকে তেওঁক মৃত বুলি ঘোষণা কৰে। এই ঘটনাৰ লগত জড়িত আটাইকেইজনৰ নাম নাবালক হোৱাৰ বাবে আৰক্ষীয়ে প্ৰকাশ কৰা নাই। ঘটনাৰ পিছতে অভিযুক্ত নাবালকজন আৰু তেওঁৰ ভাতৃ পলায়ন কৰে।
যেতিয়া আৰক্ষীয়ে মৃতদেহটো মৰণোত্তৰ পৰীক্ষাৰ বাবে পঠিয়াব বিচাৰিছিল, তেতিয়া মৃত কিশোৰজনৰ পৰিয়ালে প্ৰথমে সন্মতি প্ৰকাশ কৰা নাছিল। অভিযুক্ত দুজনক গ্ৰেপ্তাৰ নোহোৱা পৰ্যন্ত মৃতকৰ পৰিয়ালে শ্মশান সম্পন্ন নকৰে বুলি দাবী কৰিছে। স্থানীয় কোটিয়ালী থানাৰ ভাৰপ্ৰাপ্ত বিষয়া বিক্ৰম সিঙে ঘটনাস্থলীত গৈ পৰিয়ালৰ লোকক উপযুক্ত পদক্ষেপ লোৱাৰ আশ্বাস দিয়াৰ পিছতে মৃতকৰ পৰিয়ালৰ লোকে মৰণোত্তৰ পৰীক্ষাৰ বাবে সন্মতি দিয়ে। মৃত যুৱকজনৰ পৰিয়ালে কোটিয়ালী থানাত হত্যাৰ এজাহাৰ দাখিল কৰে।
আৰক্ষীয়ে জনোৱা মতে, মৃত কিশোৰজনৰ দুজন ভাতৃ আৰু চাৰিগৰাকী ভগ্নী আছে। দেউতাক এজন সৰু খেতিয়ক। গাঁওবাসীয়ে দাবী কৰে যে তিনি বছৰ পূৰ্বে অভিযুক্তৰ পৰিয়ালৰ লোকে মৃত কিশোৰজনৰ ককাককো মাৰপিট কৰিছিল। সোমবাৰৰ এই কাণ্ডৰ সৈতে কোনো সম্পৰ্ক আছে নেকি তদন্তকাৰীয়ে তদন্ত কৰি আছে। অভিযুক্ত ভাতৃদ্বয়ৰ সন্ধান আৰম্ভ কৰিছে আৰক্ষীয়ে।
Continue Reading
