ডিজিটেল ডেস্কঃ দিল্লীৰ এখন ফাইভ ষ্টাৰ হোটেল বিপদত পৰিছে। হোটেলখনৰ নাম হোটেল ৰ’জেট হাউচ। হোটেল ৰ’জেট হাউচে অভিযোগ কৰিছে যে ইয়াত এজন যুৱকে দুবছৰ ধৰি বিনা পইচাৰে থাকিল। ইয়াৰ ফলত হোটেলখনৰ ৫৮ লাখ টকাৰ লোকচান হোৱা বুলি অভিযোগ উঠিছে। এই বিষয়টো পোহৰলৈ অহাৰ পাছত ইন্দিৰা গান্ধী আন্তঃৰাষ্ট্ৰীয় বিমানবন্দৰৰ সমীপৰ এৰ’চিটিত অৱস্থিত হোটেল ৰোজেট হাউছে এই সন্দৰ্ভত আই জি আই বিমানবন্দৰ থানাত গোচৰ ৰুজু কৰিছে।
পঞ্চ তাৰকাযুক্ত হোটেল ৰোজেট পৰিচালনা কৰা বাৰ্ড এয়াৰপৰ্টছ হোটেল প্ৰাইভেট লিমিটেডৰ কৰ্তৃত্বপ্ৰাপ্ত প্ৰতিনিধি বিনোদ মালহোত্ৰাই শেহতীয়াকৈ দাখিল কৰা এফআইআৰ অনুসৰি অংকুশ দত্ত নামৰ এজন যুৱকে দুবছৰ ধৰি হোটেলখনত আছিল। অংকুশ দত্তৰ ৫৮ লাখ টকাৰ বিল উঠিছিল যদিও হোটেলখনৰ পৰা ওলাই অহাৰ সময়ত তেওঁ এটকাও পৰিশোধ নকৰিলে।
ৰোজেট হোটেলৰ পৰিচালনা সমিতিয়ে এফআইআৰত অভিযোগ কৰিছে যে হোটেলখনৰ ফ্ৰণ্ট অফিচ বিভাগৰ মুৰব্বী প্ৰেম প্ৰকাশে অংকুশ দত্তক নিয়ম উলংঘা কৰি হোটেলখনত দীৰ্ঘদিন থাকিবলৈ অনুমতি দিছিল। এফআইআৰৰ মতে, হোটেলৰ কোঠাৰ ভাড়া সন্দৰ্ভত সিদ্ধান্ত ল’বলৈ প্ৰেম প্ৰকাশক কৰ্তৃত্ব দিয়া হৈছিল।
প্ৰকাশে দত্তৰ সৈতে অংকুশে গোপন বুজাবুজি কৰি জালিয়াতি কাণ্ড কৰে বুলি অভিযোগ উঠিছে। ৰোজেট হোটেল মেনেজমেণ্টৰ দাবী যে ২০১৯ চনৰ ৩০ মে’ত দত্তই হোটেলখনত এৰাতিৰ বাবে কোঠা বুকিং কৰিছিল। তেওঁ অভিযোগ কৰিছে যে দত্তই ২০১৯ চনৰ ৩১ মে’ত হোটেলখন এৰিব লাগিছিল যদিও ২০২১ চনৰ ২২ জানুৱাৰীলৈকে তাতেই আছিল।
এতিয়া ফাইভ ষ্টাৰ ৰোজেট হোটেল মেনেজমেণ্টে দোষীৰ বিৰুদ্ধে কঠোৰ আইনী ব্যৱস্থা গ্ৰহণৰ দাবী জনাইছে। দোষীয়ে ইচ্ছাকৃতভাৱে ঠগ, প্ৰতাৰণা, জালিয়াতি আৰু একাউণ্টৰ লগত খেলা-ধূলা কৰি জালিয়াতি কৰা বুলি অভিযোগ উত্থাপন কৰিছে হোটেল পৰিচালনা সমিতিয়ে। অভিযোগৰ ভিত্তিত ইন্দিৰা গান্ধী আন্তঃৰাষ্ট্ৰীয় বিমানবন্দৰ আৰক্ষী থানাই বিষয়টোৰ তদন্ত চলাই আছে।
Continue Reading
