ডিজিটেল ডেস্ক: দেশৰ আগশাৰীৰ ইংৰাজী নিউজ চেনেল ‘টাইমছ নাও’ৰ মুখ্য সম্পাদক পদৰ পৰা পদত্যাগ কৰিছে জ্যেষ্ঠ সাংবাদিক ৰাহুল শিৱশংকৰে৷
ৰাহুল শিৱশংকৰে আকস্মিকভাৱে চেনেলটোৰ পৰা পদত্যাগ কৰা বিষয়টোক লৈ দেশৰ সংবাদ জগতত সৃষ্টি হৈছে নতুন নতুন চৰ্চাৰ৷ অৱশ্যে, তেওঁ চেনেলটোৰ পৰা পদত্যাগ কৰাৰ কাৰণ এতিয়াও জানিব পৰা হোৱা নাই। ইতিমধ্যে, শিৱশংকৰে চেনেলটোৰে সংলগ্ন ৱাটছএপ গ্ৰুপসমূহৰ পৰাও আঁতৰি আহিছে। আনকি, পদত্যাগ কৰাৰ পাছত শিৱশংকৰে তেওঁৰ টুইটাৰ বায়’ আপডেট কৰিছে, য’ত তেওঁ লিখিছে- ‘Editor-In-Chief TIMES NOW, 2016 to 2023’.
চেনেলটোৰ পৰিচালন মণ্ডলীৰে জড়িত এজন জ্যেষ্ঠ সদস্যইও শিৱশংকৰৰ চেনেলটোৰ পৰা প্ৰস্থান কৰাটো নিশ্চিত কৰিছে।
শিৱশংকৰৰ প্ৰস্থানৰ পাছত সদ্যহতে চেনেলটো গ্ৰুপ এডিটৰ নাভিকা কুমাৰৰ অধীনত পৰিচালনা কৰা হ’ব। টাইমছ নাও দলৰ অপাৰেটিং কণ্টেণ্ট মেনেজাৰসকলে এতিয়াৰ পৰা নাভিকাক প্ৰতিবেদন জমা দিব।
২০১৬ চনত নিউজএক্সৰ মুখ্য সম্পাদক পদৰ পৰা পদত্যাগ কৰাৰ পাছত শিৱশংকৰে চেনেলটোৰ সৈতে যাত্ৰা আৰম্ভ কৰিছিল। টাইমছ নাওত প্ৰাইমটাইম শ্ব’ ‘নিউজ আৱাৰ’ৰ আঁত ধৰিছিল শিৱশংকৰে৷ সংবাদ ক্ষেত্ৰত ২০ বছৰৰ অভিজ্ঞতাৰে পুষ্ট ৰাহুল শিৱশংকৰ৷
Continue Reading
