ব্ৰাহ্মণক অপমান! প্ৰাক্তন মুখ্যমন্ত্ৰীৰ জিভা কাটিলে পাব ১১ লাখ টকাৰ পুৰষ্কাৰ

ডিজিটেল ডেস্ক: এগৰাকী প্ৰাক্তন মুখ্যমন্ত্ৰীয়ে ব্ৰাহ্মণ সমাজক কৰা অপমানক লৈ গৰজি উঠিছে এজন বিজেপি নেতা। বিহাৰৰ প্ৰাক্তন মুখ্যমন্ত্ৰী জীতন ৰাম মাঞ্জিয়ে ব্ৰাহ্মণ সম্পৰ্কে অপমানসূচক মন্তব্য আগবঢ়োৱা বাবে ৰাজ্যখনৰ বিজেপি নেতা গজেন্দ্ৰ ঝায়ে নেতাগৰাকীৰ জিভা কটাৰ বিনিময়ত ১১ লাখ টকাৰ পুৰষ্কাৰ ঘোষণা কৰিছে। ইয়াকে লৈ এতিয়া গৰম হৈ উঠিছে বিহাৰৰ ৰাজনৈতিক বাতাবৰণ।

২০১৪-২০১৫ত বিহাৰৰ মুখ্যমন্ত্ৰী হিচাপে কাৰ্যনিৰ্বাহ কৰা হিন্দুস্তানী আৱাম মৰ্চাৰ নেতা জীতন ৰাম মাঞ্জিয়ে ব্ৰাহ্মণ সম্পৰ্কে অপমানসূচক মন্তব্য আগবঢ়োৱা বাবে ইতিমধ্যে ক্ষমা বিচাৰিছে। কিন্তু ইমানতে ক্ষান্ত নাথাকি গজেন্দ্ৰ ঝায়ে নেতাগৰাকীৰ বিৰুদ্ধে আক্ৰমণাত্মক স্থিতি লোৱা পৰিলক্ষিত হৈছে। ব্ৰাহ্মণক লৈ বিতৰ্কিত মন্তব্য কৰা জীতন ৰাম মাঞ্জিৰ বিৰুদ্ধে বিহাৰৰ ন্যায়ালয় আৰু আৰক্ষী চকীত অভিযোগ দাখিল কৰা হয়। তেওঁৰ বিৰুদ্ধে ব্যৱস্থা গ্ৰহণৰ প্ৰৱল দাবী উত্থাপিত হৈছে। এই ঘটনাক কেন্দ্ৰ কৰি বিহাৰৰ বিজেপি নেতা গজেন্দ্ৰ ঝাই এক বিতৰ্কিত মন্তব্য আগবঢ়ায়। মাঞ্জিক আক্ৰমণৰ লক্ষ্য কৰি তেওঁ কয় যে, যিজন ব্ৰাহ্মণ ল'ৰাই মাঞ্জিৰ জিভা কাটিব পাৰিব তেওঁক ১১ লাখ টকাৰ পুৰষ্কাৰ প্ৰদান কৰা হ'ব। ঝাৰ এনে মন্তব্যৰ পাছতেই হিন্দুস্তানী আৱাম মৰ্চাই তীব্ৰ প্ৰতিক্ৰিয়া প্ৰকাশ কৰিছে।

গজেন্দ্ৰ ঝাৰ মন্তব্যৰ পাছতেই এতিয়া বিহাৰত হিন্দুস্তানী আৱাম মৰ্চা আৰু বিজেপি নেতাৰ মাজত তুমুল বাক্যবাণ চলিছে। হিন্দুস্তানী আৱাম মৰ্চাৰ নেতাই সকীয়নিও দিয়ে গজেন্দ্ৰ ঝাক।