ইঞ্জিনীয়েৰৰ ক'লা জীন, ক'ত হেৰাল ৰে'লৰ ইঞ্জিন!

ডিজিটেল ডেস্কঃ এজন ৰে’ল অভিযন্তাৰ বিৰুদ্ধে এটা পৰিত্যক্ত ৰে’ল ইঞ্জিন বিক্ৰী কৰাৰ অভিযোগ উঠিছে। ঘটনাটো বিহাৰৰ পূৰ্ণিয়া জিলাত সংঘটিত হৈছে। আৰক্ষীসূত্ৰই জনোৱা অনুসৰি, অভিযুক্তজনে ৰেলৱে’ ইঞ্জিনিয়াৰজনে বিহাৰৰ সমস্তিপুৰত লোকো ডিজেল শ্বেডত কৰ্মৰত হৈ আছিল। তেওঁ আন কেইবাজনো ৰে'ল বিষয়া আৰু নিৰাপত্তাৰক্ষীৰ সৈতে লগ-লাগি কৰি পূৰ্ণিয়া ৰে’ল ষ্টেচনত পৰি থকা পৰিত্যক্ত ৰে’ল ইঞ্জিন বিক্ৰী কৰিলে বুলি অভিযোগ উত্থাপন হৈছে। পূৰ্ণিয়া আৰক্ষীয়ে ইতিমধ্যে ৰে’ল ইঞ্জিন চুৰি কৰা কাৰ্যক লৈ এখন এজাহাৰ দাখিল কৰিছে।

অনুসন্ধানৰ পিছত আৰপিএফে পূৰ্ণিয়াৰ গুলবাগ অঞ্চলৰ পৰা ইঞ্জিনৰ এটা অংশ উদ্ধাৰ কৰে। আৰপিএফৰ সূত্ৰই জনোৱা অনুসৰি, উক্ত ঘটনাটোৰ লগত কিছু আৰক্ষী বিষয়া আৰু সুৰক্ষা বাহিনী জড়িত থকাৰ সন্দেহ প্ৰকাশ কৰিছে আৰু ইয়াৰ আঁৰত এক ডাঙৰ ৰেকেট খকাৰো সন্দেহ প্ৰকাশ কৰিছে৷

খবৰ অনুসৰি, অভিযুক্তজনে ১৪ ডিচেম্বৰত পূৰ্ণিয়া আদালত ৰে’ল ষ্টেচনত উপস্থিত হৈছিল আৰু পৰিত্যক্ত ৰে’ল ইঞ্জিনটো গেছ কাটাৰেৰে সৰু সৰু অংশত কাটি পেলাইছিল। পূৰ্ণিয়া আউটপ'ষ্টৰ দায়িত্বত থকা এম এম ৰহমান নামৰ এজন বিষয়াই সমগ্ৰ ঘটনাটোৰ সাক্ষী হৈ আছিল।

কৰ্তব্যৰত বিষয়াজনে অভিযুক্ত অভিযন্তাজনক ঘটনাটো সন্দৰ্ভত সোধাত তেওঁ সমস্তিপুৰৰ বিভাগীয় যান্ত্ৰিক অভিযন্তা বুলি এখন ভুৱা প্ৰমাণ পত্ৰ দেখুৱাই আৰু লগতে তেওঁ কৈছিল যে ইঞ্জিনৰ অংশবোৰ সমস্তিপুৰ লোকো শ্বেডলৈ লৈ যোৱা হ'ব। কিন্তু সেই শ্বেডটোলৈ লৈ যোৱাৰ পৰিৱৰ্তে অভিযন্তাজনে বিকল ৰে’ল ইঞ্জিনটো বিক্ৰীহে কৰিলে। সমস্তিপুৰৰ বিভাগীয় ৰে'ল প্ৰৱন্ধক (ডিআৰএম) আলোক আগৰৱালে ঘটনা সন্দৰ্ভত কয় যে, "এই ঘটনাটোৰ তদন্তৰ প্ৰক্ৰিয়া অব্যাহত আছে, অতি সোনকালে দোষীক চিনাক্ত কৰি শাস্তি বিহা হ’ব৷"