ডিজিটেল ডেস্কঃ বাংগালুৰুৰ এখন ৰেষ্টুৰেণ্টত বিস্ফোৰণ ঘটাৰ ঘটনাই তীব্ৰ প্ৰতিক্ৰিয়াৰ সৃষ্টি কৰিছে। বাংগালুৰুৰ কুণ্ডলাহাল্লিৰ ৰামেশ্বৰম ৰেষ্টুৰেণ্টত বিস্ফোৰণটো সংঘটিত হয় । ঘটনাটোত পাঁচজন লোক আহত হৈছে। ঘটনাটোৰ পিছতে স্থানীয় আৰক্ষীয়ে পৰিস্থিতি নিয়ন্ত্ৰণ কৰিবলৈ ঘটনাস্থলীত উপস্থিত হয়।
কৰ্ণাটকৰ মুখ্যমন্ত্ৰী সিদ্ধাৰামাইয়াই নিশ্চিত কৰিছে যে এয়া এটা আইইডি বিস্ফোৰণ আছিল। প্ৰথমতে ঘটনাটোৰ সৈতে উগ্ৰপন্থী জড়িত থকাৰ সন্দেহ কৰা হৈছে। ঘটনাটোত কোন জড়িত আছে সেই বিষয়ত আৰক্ষীয়ে তদন্ত আৰম্ভ কৰিছে । অনুসন্ধানকাৰীসকলে ধাৰণা কৰিছে যে বিস্ফোৰণটোত কম তীব্ৰতাৰ বিস্ফোৰক ব্যৱহাৰ কৰা হৈছিল।
এজন অচিনাক্ত ব্যক্তিয়ে ৰেষ্টুৰেণ্টৰ ভিতৰত বিস্ফোৰক সামগ্ৰী থকা মোনাটো এৰি থৈ গৈছিল। চিচিটিভি ফুটেজ পৰীক্ষা কৰি এই কথা নিশ্চিত কৰা হৈছে।
কেন্দ্ৰীয় বাংগালুৰুৰ বিজেপি সাংসদ পিচি মোহনে এক্সত লিখিছে, "ৰামেশ্বৰম ৰেষ্টুৰেণ্টত বিস্ফোৰণৰ বিষয়ে শুনি মই দুখিত। আহত আৰু তেওঁলোকৰ পৰিয়ালৰ প্ৰতি মোৰ সমবেদনা জনাইছো। মই প্ৰশাসনক বাংগালুৰুৰ বাসিন্দাসকলৰ সুৰক্ষা নিশ্চিত কৰিবলৈ অনুৰোধ জনাইছো। বাংগালুৰুৰ আৰক্ষী আয়ুক্ত বি দয়ানন্দ ঘটনাস্থলীত উপস্থিত হৈ তদন্ত আৰম্ভ কৰিছে। তেওঁ কয় "বিস্ফোৰণৰ বিষয়ে খবৰ পোৱাৰ পিছত আমি ঘটনাস্থলীলৈ ততাতৈয়াকৈ গৈছিলো," ।বিস্ফোৰণস্থলীৰ পৰা নমুনা সংগ্ৰহ কৰিবলৈ এটা ফৰেনচিক দলো ঘটনাস্থলীত উপস্থিত হৈছে।
Continue Reading
