ডিজিটেল ডেস্কঃ কৰ্ণাটকৰ বাংগালুৰুত সংঘটিত হৈছে এক ভয়ংকৰ ঘটনা। চহৰ খনত বাস কৰা এগৰাকী মহিলা চৰকাৰী বিষয়াক বাংগালুৰুত থকা তেওঁৰ নিজৰ ঘৰতে দুৰ্বৃত্তই ছুৰীকাঘাত কৰি হত্যা কৰাৰ ঘটনাই তীব্ৰ প্ৰতিক্ৰিয়াৰ সৃষ্টি কৰিছে। আৰক্ষীয়ে জানিবলৈ দিয়া মতে কৰ্ণাটকৰ খনি আৰু ভূ-বিজ্ঞান বিভাগৰ উপ-সঞ্চালক হিচাপে কাৰ্যনিৰ্বাহ কৰি থকা প্ৰতিমাক সুব্ৰমন্যপোৰাত থকা তেওঁৰ বাসগৃহতে ছুৰীকাঘাত কৰি হত্যা কৰা হয়।
৪৫ বছৰীয়া প্ৰতিমাৰ ড্ৰাইভাৰে তেওঁক ঘৰত নমাই থৈ যোৱাৰ পিছতে ঘটনাটো ঘটে। , মহিলাগৰাকীয়ে সেই ঘৰটোত আঠ বছৰৰো অধিক সময় ধৰি বাস কৰি আছিল। খবৰ অনুসৰি নিশা প্ৰায় ৮:৩০ বজাত তেওঁক হত্যা কৰা হৈছিল। সেই সময়ত মহিলাগৰাকীৰ স্বামী আৰু পুত্ৰ ঘৰৰ বাহিৰত আছিল।
প্ৰতিমাৰ ভাতৃয়ে দেওবাৰে পুৱা মহিলাগৰাকীৰ ঘৰলৈ গৈ মহিলাগৰাকীক মৃত অৱস্থাত পাইছিল। আগদিনা ৰাতি মহিলাগৰাকীক তেওঁৰ ভাতৃয়ে ফোন কৰিছিল, কিন্তু কোনো উত্তৰ পোৱা নাছিল। মৃতদেহ দেখাৰ পিছতে মহিলাগৰাকীৰ ভাতৃয়ে আৰক্ষীৰ সৈতে যোগাযোগ কৰে।। আৰক্ষীয়ে এটা গোচৰ ৰুজু কৰি আৰু তদন্ত চলাই আছে। মহিলাগৰাকীক কোনো পৰিচিত লোকেই হত্যা কৰা বুলি সন্দেহ কৰা হৈছে।
Continue Reading
