ডিজিটেল ডেস্কঃ বৰদিনৰ দিনা ভয়ংকৰ সন্ত্ৰাসবাদী আক্ৰমণৰ বলি হয় নাইজেৰিয়া। সোমবাৰৰ পৰা আফ্ৰিকান দেশখনত খ্ৰীষ্টান সম্প্ৰদায়ৰ ওপৰত বাৰে বাৰে আক্ৰমণ চলি আহিছে। হিংসাত্মক ঘটনাত মৃত্যু হোৱা লোকৰ সংখ্যা ১৬০ৰো অধিক। এই ঘটনাৰ আঁৰত ইছলামিক উগ্ৰপন্থী সংগঠন বকো হাৰাম আৰু ইয়াৰ কিছু সংযুক্ত সংগঠন আছে বুলি অভিযোগ উত্থাপন হৈছে।
পশ্চিমীয়া কেইবাখনো সংবাদ মাধ্যমে প্ৰকাশ কৰা অনুসৰি দেওবাৰৰ পৰা মধ্য নাইজেৰিয়াৰ মালভূমি প্ৰদেশত প্ৰথম আক্ৰমণ আৰম্ভ হয়। ইয়াৰ পিছতে আশে-পাশে থকা কিছুমান অঞ্চলত আক্ৰমণ আৰম্ভ হয়। মূলতঃ খ্ৰীষ্টান আৰু পৰম্পৰাগত খিলঞ্জীয়া ধৰ্মৰ ২০টা সম্প্ৰদায়ক আক্ৰমণ কৰা হয়। হত্যাৰ লগতে জুই, ধৰ্ষণ, লুণ্ঠন আদিও মুক্তভাৱে চলি থাকে। নাইজেৰিয়াৰ সেনাই এই পৰিস্থিতি চম্ভালিবলৈ সক্ৰিয় হৈ পৰিছে।
প্ৰকাশিত বাতৰি অনুসৰি প্লেট’ প্ৰদেশৰ বক্কোছ অঞ্চলত কমেও ১১৩ জন লোকৰ মৃত্যু হৈছে। স্থানীয় একাংশ অপৰাধী চক্ৰও আক্ৰমণ আৰু লুণ্ঠনত জড়িত হোৱাৰ খবৰ পোৱা গৈছে।
বকোছ প্ৰশাসনৰ মুৰব্বী মণ্ডে কাছাৰ মতে, এই আক্ৰমণত কমেও ৩০০ লোক গুৰুতৰভাৱে আহত হৈছে। নাইজেৰিয়াৰ ৰাষ্ট্ৰপতি বোলা আহমেদ টিনুবুৱে আক্ৰমণকাৰীৰ বিৰুদ্ধে কঠোৰ ব্যৱস্থা গ্ৰহণৰ সকীয়াই দিছে। কাকতলীয়াকৈ ক’বলৈ গ’লে মধ্য নাইজেৰিয়া দীৰ্ঘদিন ধৰি ‘সাম্প্ৰদায়িক সংবেদনশীল অঞ্চল’ হিচাপে পৰিচিত। বিগত সময়ত এই অঞ্চলত খ্ৰীষ্টান আৰু জনজাতীয় লোককো আক্ৰমণ কৰা হৈছে। যোৱা দুটা দশকত তাত ইছলামিক জেহাদীৰ আক্ৰমণত কমেও ৬২ হাজাৰ অমুছলমান নাগৰিকৰ মৃত্যু হৈছে। ৫০ লাখৰো অধিক লোকক উচ্ছেদ কৰা হৈছে।
Continue Reading
