ডিজিটেল ডেস্কঃ বেন ষ্টোকছৰ বেগ চুৰি হ’ল। লণ্ডনৰ কিংছ ক্ৰাছ ষ্টেচনৰ পৰা ইংলেণ্ডৰ টেষ্ট অধিনায়কৰ কাপোৰেৰে ভৰা এটা বেগ চুৰি হৈছে। ক্ষুব্ধ ষ্ট’কছে ছ’চিয়েল মিডিয়াত এই কথা প্ৰকাশ কৰে। নিউজিলেণ্ড ভ্ৰমণ সম্পূৰ্ণ কৰি ঘৰলৈ উভতি অহাৰ পিছতে এইদৰে ক্ষোভিত হৈ পৰিছে ষ্ট’কছ।
ৰেল ষ্টেচনত তেওঁৰ বেগ চুৰি হোৱাৰ বাবে খং উঠিছে ষ্টোকছৰ। তেওঁ জনায় যে কাপোৰৰ বাহিৰেও বেগটোত আৰু কিছুমান বস্তু আছিল। ছ’চিয়েল মিডিয়াত তেওঁ লিখিছে, “যিয়েই মোৰ বেগটো কিংছ ক্ৰাছৰ পৰা চুৰি কৰিছিল, মই ভাবো মোৰ কাপোৰবোৰ তেওঁৰ বাবে ডাঙৰ হ’ব।”
নিউজিলেণ্ডৰ বিৰুদ্ধে টেষ্ট শৃংখলাত খেলি ঘৰলৈ উভতি আহিছিল ষ্টকছ। কিছুদিনৰ পিছত ভাৰতলৈ আহিব আই পি এল খেলিবলৈ। ইংলেণ্ডৰ অল ৰাউণ্ডাৰগৰাকীয়ে মহেন্দ্ৰ সিং ধোনীৰ চেন্নাই ছুপাৰ কিংছৰ হৈ খেলিব।
যোৱা টি-২০ বিশ্বকাপত ইংলেণ্ডৰ বিশ্বকাপ জয়ৰ ক্ষেত্ৰত ষ্ট’কছে গুৰুত্বপূৰ্ণ ভূমিকা পালন কৰিছিল। কিছুদিন পূৰ্বে এদিনীয়া ক্ৰিকেটৰ পৰা অৱসৰ গ্ৰহণ কৰিছিল ষ্ট’কছে। ক্ৰিকেট প্ৰেমীৰ এটা অংশই ষ্টকছক অৱসৰ লোৱাৰ সলনি পুনৰ এদিনীয়া ক্ৰিকেট খেলিবলৈ আহ্বান জনায়। অহা অক্টোবৰ মাহত অনুষ্ঠিত হ’বলগীয়া এদিনীয়া বিশ্বকাপত ইংলেণ্ড দলত ষ্টকছক দেখা পাব বিচাৰিছে।
Continue Reading
