ডিজিটেল ডেস্ক: কোনো ব্যক্তি ডায়বেটিছত আক্ৰান্ত হ’লে তেওঁক চাউল খোৱাৰ ক্ষেত্ৰত সাৱধান হ’বলৈ পৰামৰ্শ দিয়া হয়৷ ইয়াৰ অন্তৰালৰ কাৰণ হৈছে চাউলত প্ৰচুৰ পৰিমাণে থকা কাৰ্ব’হাইড্ৰেট বা শৰ্কৰা৷ ইয়াৰ ফলত শৰীৰত ব্লাড চুগাৰৰ মাত্ৰা বৃদ্ধি পায়৷ কিন্তু কিছুসংখ্যক লোকৰ চাউল ইমানেই প্ৰিয় যে তেওঁলোকে এই অভ্যাস এৰিব নোৱাৰে৷ এনে লোকসকলৰ বাবে নতুন আশা কঢ়িয়াই আনিছে গ্ৰেটাৰ নয়ডাৰ GIMS চিকিৎসালয়ত কৰ্মৰত চিকিৎসক ড° আয়ুসী যাদৱৰ এক পৰামৰ্শই৷ ড° যাদৱৰ মতে ডায়বেটিছ ৰোগী সকলে বগা চাউলৰ বিপৰীতে ক’লা চাউল খোৱাটো স্বাস্থ্যসন্মত৷
ক’লা চাউল বা ব্লেক ৰাইচ শৰীৰৰ বাবে যথেষ্ট উপকাৰী৷ এই চাউলক বেঙুনীয়া চাউল বুলিও জনা যায়৷ ডায়বেটিছ ৰোগীৰ বাবে এই চাউল উপকাৰী বুলি প্ৰমাণিত হৈছে৷ এই চাউলত কিছুমান এনে উপকাৰী পদাৰ্থ পোৱা যায়, যি ব্লাড চুগাৰ নিয়ন্ত্ৰণতো সহায় কৰে৷
ক’লা চাউলত প্ৰচুৰ মাত্ৰাত আইৰণ, প্ৰ’টিন, ফাইবাৰ পোৱা যায়৷ এন্থোচাইনিন থকাৰ বাবে এই চাউলক ইষৎ বেঙুনীয়াও দেখা যায়৷ এন্থোচাইনিনে ডায়বেটিছ ৰোগীক কোষ ধ্বংস হোৱাৰ পৰা বচায়৷ লগতে শৰীৰৰ বৰ্ধিত ওজন হ্ৰাসতো সহায় কৰে এই ক’লা চাউলে৷
ডায়বেটিছ ৰোগত আক্ৰান্তসকল প্ৰায়েই হৃদৰোগত আক্ৰান্ত হোৱাৰ সম্ভাৱনা থাকে৷ ক’লা চাউলে হৃদৰোগ প্ৰতিৰোধৰ ক্ষেত্ৰতো সহায় কৰে বুলি জানিব পৰা গৈছে৷ এই চাউলত প্ৰচুৰ মাত্ৰাত প্ৰ’টিন থাকে৷ এই প্ৰ’টিনৰ বাবে কম পৰিমাণে ভাত খালেও পেট ভৰি থকা যেন লাগে আৰু ভোকো কমকৈ লাগে৷
Continue Reading
