ডিজিটেল ডেস্ক : প্ৰখ্যাত অভিনেত্ৰী ছোনম কাপুৰৰ দিল্লীৰ বাসগৃহত সংঘটিত হোৱা চুৰিকাণ্ডই তীব্ৰ চাঞ্চল্যৰ সৃষ্টি কৰিছিল। প্ৰায় আঢ়ৈ কোটি টকা মূল্যৰ ধন আৰু আ-অলংকাৰ চুৰি হৈছিল ছোনমৰ দিল্লীৰ ঘৰৰ পৰা। এই ঘটনাই সৃষ্টি কৰিছিল ব্যাপক চাঞ্চল্যৰ। কিন্তু এই ঘটনাৰ ভেদ ভঙাৰ পাছত চাঞ্চল্য অধিক বৃদ্ধিহে পালে। কিয়নো ছোনমৰ ঘৰত চুৰি কৰা অপৰাধীজন কোনো দাগী অপৰাধী নাছিল। ঘৰৰ ভিতৰতে অৱস্থান কৰি আছিল চোৰে।
এতিয়া কোনো মানুহকে বিশ্বাসত ল’ব নোৱৰা এটা পৰিস্থিতিৰ সৃষ্টি হৈছে। বিশ্বাসেৰে কাৰোবাক ঘৰ চপাই নিলেও তেওঁলোকেই বিশ্বাসঘাতকতা কৰাৰ ঘটনা সংঘটিত হৈছে। ছোনম কাপুৰৰ ক্ষেত্ৰতো সেই ঘটনাই ঘটিল। ছোনম কাপুৰৰ ঘৰৰ পৰা আঢ়ৈ কোটি টকাৰ ধন-সোণ লুটি নিয়া চোৰ আৰক্ষীৰ জালত পৰাত সকলোৰে চকু কপালত উঠিল। কিয়নো এই চুৰি কৰিছিল তেওঁলোকৰ ঘৰত নিযুক্ত এগৰাকী নাৰ্ছে। ছোনমৰ ঘৰত কৰ্মৰত নাৰ্ছগৰাকীক তেওঁৰ স্বামীৰ সৈতে গ্ৰেপ্তাৰ কৰিছে আৰক্ষীয়ে।
অপৰ্না ৰথ উইলছন নামৰ নাৰ্ছগৰাকীক অভিনেত্ৰীগৰাকীৰ শাহুৱেকক চোৱা চিতা কৰাৰ বাবে নিযুক্ত কৰা হৈছিল। অমৃতা শ্বেৰগীল পথত থকা তেওঁলোকৰ ঘৰত নিযুক্ত কৰা হৈছিল নাৰ্ছগৰাকীক। আনহাতে তেওঁ স্বামী নৰেশ কুমাৰ সাগৰে শ্বাকাৰপুৰৰ এটা ব্যক্তিগত প্ৰতিষ্ঠানত একাউণ্টেণ্ট হিচাপে কাম কৰিছিল।
বিগত ১১ ফেব্ৰুৱাৰীত এই চুৰিকাণ্ড সংঘটিত হয়। ২৩ ফেব্ৰুৱাৰীত এই সন্দৰ্ভত গোচৰ ৰুজু কৰে তোঘলক ৰোড আৰক্ষী থানাই। তাৰ পাছৰ পৰাই আৰক্ষীয়ে তদন্ত প্ৰক্ৰিয়া চলাই গৈছিল। মঙলবাৰে নিশা আৰক্ষীয়ে সৰিতা বিহাৰত তালাচী অভিযান চলাই নাৰ্ছ উইলচন আৰু তেওঁৰ স্বামীক গ্ৰেপ্তাৰ কৰে। অৱশ্যে এতিয়াও চুৰি কৰা গহনা আৰু ধনখিনি উদ্ধাৰ কৰিবলৈ বাকী আছে।
Continue Reading
