ডিজিটেল ডেস্কঃ বিয়াৰ সময়তে হঠাতে হৃদৰোগত আক্ৰান্ত হৈ কইনাৰ মৃত্যু হোৱাৰ এক কৰুণ ঘটনা ঘটিছে গুজৰাটত। কিন্তু কইনাৰ মৃত্যু ঘটাৰ পিছতো বিয়াখন ৰৈ যোৱা নাছিল। পৰিয়ালৰ সদস্যসকলে কইনাৰ ভনীয়েকক দৰাৰ সৈতে বিয়া কৰোৱাই দিয়ে।
ঘটনাটো সংঘটিত হৈছে গুজৰাটৰ ভাৱনগৰ অঞ্চলত। মৃতকৰ নাম হেতাল। হেতাল নামৰ যুৱতীগৰাকীৰ সৈতে বিশালৰ বিবাহ অনুষ্ঠান ভগৱানেশ্বৰ মহাদেৱ মন্দিৰত অনুষ্ঠিত কৰা হৈছিল। দুয়োটা পৰিয়ালৰ সকলোৱে পুৱাৰে পৰা বিয়াখনত উপস্থিত আছিল।
কইনাগৰাকীয়েও এটা এটাকৈ নিয়ম অনুসৰণ কৰি গৈছিল। কিন্তু হঠাতে ছন্দ পতন ঘটে। সংগীত আৰু আনন্দৰ মাজতে যুৱতীগৰাকীয়ে হঠাতে মূৰ ঘূৰাই অজ্ঞান হৈ পৰে। বিয়া খন সম্পূৰ্ণ হোৱাৰ আগতেই তেওঁৰ মৃত্যু হয়। চিকিৎসকে কইনাৰ হৃদৰোগত আক্ৰান্ত হৈ মৃত্যু ঘটা বুলি প্ৰকাশ কৰে৷ কইনাৰ এনে আকস্মিক মৃত্যুত বিবাহস্থলীত শোকৰ ছাঁ পেলায়।
কিন্তু বিয়াৰ অনুষ্ঠান বন্ধ হোৱা নাছিল। কান্দোনৰ মাজতে আত্মীয়সকলে কইনাৰ ভনীয়েকক দৰাৰ সৈতে বিয়া দিয়ে৷ কইনাৰ ভনীয়েকক বিয়া কৰোৱাৰ সময়ত কইনাৰ মৃতদেহ এটা শীতলীগৃহত ৰখা হৈছিল৷ বিবাহ সম্পূৰ্ণ হোৱাৰ পিছত পৰিয়ালৰ সদস্যসকলে মৃতকৰ অন্তিম সংস্কাৰ সম্পন্ন কৰে।স্থানীয় প্ৰশাসনে ঘটনাটোক "অতি দুখজনক" বুলি বৰ্ণনা কৰিছে।
Continue Reading
