--°C
Loading...
Listen to Article
2 min read
80%
ডিজিটেল ডেস্ক: নানা অভিনৱ মনোৰঞ্জনধৰ্মী দৃশ্যৰে সামাজিক মাধ্যমত একাংশ মিমাৰে সামাজিক মাধ্যম ব্যৱহাৰকাৰীসকলৰ মাজত হাস্যৰসৰ সৃষ্টি কৰি আহিছে। বুদ্ধিদীপ্ত কৌশল প্ৰয়োগেৰে জনসাধাৰণক হাস্যৰসৰ সমল যোগান ধৰা এই মিমাৰসকলৰ প্ৰভাৱ শেহতীয়াকৈ দেশৰ ৰাজধানী অঞ্চল দিল্লীৰ আৰক্ষী বিভাগৰ ওপৰতো পৰিছে। শেহতীয়া কিছুদিনৰ পৰা পথ সুৰক্ষা আৰু যান-বাহন চলোৱাৰ সময়ত গ্ৰহণ কৰিবলগীয়া নিয়ম তথা ব্যৱস্থাৰ বিষয়ে সজাগতা সৃষ্টিৰ ক্ষেত্ৰত দিল্লীৰ ট্ৰেফিক পুলিচে ব্যৱহাৰ কৰা অভিনৱ কৌশলে যথেষ্ট জনপ্ৰিয়তা অৰ্জন কৰিছে। সামাজিক মাধ্যম যোগে প্ৰচাৰ কৰা এনে অভিনৱ মনোৰঞ্জনধৰ্মী বিজ্ঞাপনেৰে দিল্লী ট্ৰেফিক পুলিচে জনসাধাৰণৰ মাজত বাৰুকৈয়ে আমোদৰ সৃষ্টি কৰিছে।

মূলত: পথ সুৰক্ষাৰ দৰে এক গুৰুতৰ আৰু প্ৰয়োজনীয় বিষয়ক হাস্যকৰভাৱে উপস্থাপন কৰি জনসাধাৰণক বিশেষভাৱে আকৰ্ষিত কৰাৰ চেষ্টা চলোৱা দিল্লী ট্ৰেফিক পুলিচে শেহতীয়াকৈ টুইটাৰত পুনৰ এনে এক বিজ্ঞাপন পোষ্ট কৰি ব্যাপক চৰ্চা লাভ কৰিছে। নিত্য নতুন কৌশলী বিজ্ঞাপনেৰে চমক লগোৱা বিভাগটোৱে এইবাৰ পথ সুৰক্ষাৰ বিজ্ঞাপনত ব্যৱহাৰ কৰিছে শেহতীয়াকৈ ক্ৰিকেট বিশ্বত আলোড়নৰ সৃষ্টি কৰা এখন মেচৰ এক বিশেষ দৃশ্য।

তিনিখনীয়া দ্বিপাক্ষিক এদিনীয়া শৃংখলাৰ বাবে শেহতীয়াকৈ ইংলেণ্ড ভ্ৰমণ কৰিছিল ভাৰতীয় মহিলা ক্ৰিকেট দলে। যোৱা শনিবাৰে অন্ত পৰা এই শৃংখলাত ভাৰতে উজ্জীৱিত প্ৰদৰ্শন দাঙি ধৰি ইংলেণ্ডক ৩-০ ব্যৱধানত ক্লীন চুইপ কৰে। শনিবাৰে অনুষ্ঠিত হোৱা শৃংখলাৰ অন্তিমখন এদিনীয়াত মেচখন ৰোমাঞ্চকৰ পৰিস্থিতিৰ ফালে গতি কৰাৰ সময়তে ভাৰতীয় দলৰ খেলুৱৈ দীপ্তি শৰ্মাই গ্ৰহণ কৰা এক বিশেষ কৌশল ব্যাপকভাৱে চৰ্চিত হৈ পৰিছিল।

মেচখনত বলিং কৰি থকাৰ সময়ত দীপ্তি শৰ্মাই ইংলেণ্ডৰ চাৰ্লি ডিনক নন-ষ্ট্ৰাইকাৰ এণ্ডত মানকাড নিয়মৰ আধাৰত ৰান আউট কৰি ভাৰতক বিজয়ী কৰি তুলিছিল। কিন্তু এই কৌশলৰ বাবে ক্ৰিকেট বিশ্বত যথেষ্ট বিতৰ্কৰো সৃষ্টি হৈছিল। ভদ্ৰলোকৰ খেল হিচাপে জনাজাত ক্ৰিকেটত এই মানকাড উইকেটৰ কৌশল খেলুৱৈসুলভ মানসিকতাৰ নহয় বুলি পূৰ্বৰে পৰা চৰ্চা চলি আহিছিল।

দীপ্তি শৰ্মাই শনিবাৰৰ মেচখনত গ্ৰহণ কৰা এই মানকাড উইকেটৰ কৌশলৰ দৃশ্যকে এতিয়া দিল্লী ট্ৰেফিক পুলিচে নিজৰ অফিচিয়েল টুইটাৰ হেণ্ডেলত প্ৰচাৰ কৰা পথ সুৰক্ষাৰ এটা দহ ছেকেণ্ডৰ ভিডিঅ’ত সন্নিৱিষ্ট কৰিছে। ভিডিঅ’টোৰ শিৰোনামত লিখা হৈছে, “গাড়ী চলোৱাৰ সময়ত সতৰ্কতা কিয় গুৰুত্বপূৰ্ণ…”। ভিডিঅ’ ক্লিপটোৰ শেষত কেনেকৈ এক মুহূৰ্তৰ অসাৱধানতাৰ ফলত দুৰ্ঘটনা হ’ব পাৰে সেই সন্দৰ্ভত হিন্দীত এটা সতৰ্কবাণী জাৰি কৰিছে দিল্লী ট্ৰেফিক পুলিচে।

পথ সুৰক্ষাৰ সজাগতা সৃষ্টিৰ বাবে ব্যৱহাৰ কৰা এই ভিডিঅ’টোত দৰ্শকসকলে খুবেই আমোদ পাইছে। যোৱা সপ্তাহতো দিল্লী আৰক্ষীয়ে পথ দুৰ্ঘটনা নিয়ন্ত্ৰণ কৰাত সজাগতা সৃষ্টিৰ বাবে টুইটাৰত আন এক ভিডিঅ’ টুইট কৰিছিল। ভিডিঅ’টোত এজন ব্যক্তিয়ে ট্ৰেফিকত আৱদ্ধ হৈ থকা অৱস্থাত গান গাই থকা দেখিবলৈ পোৱা গৈছিল। ভিডিঅ’টোৰ শিৰোনামত লিখা হৈছিল, “ট্ৰেফিক চিগনেলত কেনেকৈ শান্ত থাকিব লাগে…”।

সামাজিক মাধ্যম ব্যৱহাৰকাৰীসকলে সজাগতা সৃষ্টিৰ বাবে দিল্লী ট্ৰেফিক পুলিচে অৱলম্বন কৰা এই আকৰ্ষণীয় আৰু জনসাধাৰণক আমোদ দিয়াৰ লগতে মূল লক্ষ্য পূৰণত সহায় কৰিব পৰা কৌশলী পন্থাক প্ৰশংসাৰে উপচাই পেলাইছে। এনে বুদ্ধিদীপ্ত পন্থা তথা মনোৰঞ্জনমূলক পদ্ধতিয়ে দিল্লী ট্ৰেফিক পুলিচৰ প্ৰতি জনসাধাৰণক বাৰুকৈয়ে আকৃষ্ট কৰিছে। ফলস্বৰূপে টুইটাৰত ১.৪ নিযুতৰো অধিক ব্যৱহাৰকাৰীয়ে বিভাগটোক অনুসৰণ কৰিছে।


FOLLOW US F
POPULAR
FEATURE
TRENDY
হানীমুনত বাৰ্বিকিউৰ জুইত দগ্ধ নৱবিবাহিতা; দুমাহ জীৱন-মৃত্যুৰে যুঁজি অৱশেষত শেষ নিঃশ্বাস ত্যাগ
অসমৰ পৰা হেৰাই যাবলৈ ধৰিছে ‘গঙা চিলনী’
ক্ষেপণাস্ত্ৰ পৰীক্ষাৰ বাবে জাপানে ব্যৱহাৰ কৰিব ভাৰতৰ ফায়াৰিং ৰেঞ্জ, দ্বিপাক্ষিক প্ৰতিৰক্ষা সম্পৰ্ক শক্তিশালী কৰাৰ লক্ষ্য
ভাৰতৰ সেউজ শক্তিত ৭০০ কোটি ডলাৰ বিনিয়োগ কৰিব এমাজনে
উখল মাখল নলবাৰী; তেৰদিনীয়া বিস্তৃত কাৰ্যসূচীৰে ২৪ নৱেম্বৰৰ পৰা ৰাস মহোৎসৱ
কেৱল মৌখিক নির্দেশত দিয়া নিযুক্তিত কৰ্মচাৰীয়ে লাভ নকৰে পেঞ্চনকে ধৰি অন্যান্য অৱসৰকালীন সা-সুবিধা: গুৱাহাটী উচ্চ ন্যায়ালয়
আজি মুম্বাইত উপস্থিত হ’ব ব্ৰিটেইনৰ ৰাজকুমাৰ উইলিয়াম আৰু ৰাজকুমাৰী কেট; দিল্লীত প্ৰধানমন্ত্ৰী মোদীৰ সৈতে বৈঠক
ৰে’লত টিকট নাই, বিমানৰ টিকটৰো আকাশলংঘী দাম; ২৬ লাখ টকাৰ গাড়ী কিনি ষঠ পূজাৰ বাবে ঘৰলৈ আহিল এজন ব্যক্তি
২০০ মেগাৱাট বিদ্যুৎ পৰিবহণৰ লক্ষ্যৰে নির্মাণ হ’ব ভাৰত-ছিংগাপুৰ বিদ্যুৎ পৰিবাহী কৰিড’ৰ
অজনাৰ নদী চাফা কৰি চৰ্চাত অহা বিট্টু তবাহি অসুস্থ, মানুহে পুনৰ আৱৰ্জনা পেলাই লেতেৰা কৰিছে নদীখন
বাংলাদেশৰ প্রাক্তন প্রধানমন্ত্রী শ্বেখ হাছিনাৰ প্ৰত্যর্পণৰ সকলো আইনী প্রক্রিয়া সম্পূর্ণ কৰিলে ঢাকাই
TVS গ্ৰুপত সম্পত্তিক লৈ ডাঙৰ বিবাদ! ভাতৃৰ সমান অংশীদাৰী বিচাৰি পিতৃলৈ আইনী জাননী প্ৰেৰণ কন্যাৰ
উত্তৰাখণ্ডত দুটাকৈ ভয়ংকৰ দুৰ্ঘটনাত মুঠ ১২ জনৰ মৃত্যু; কেইবাজনো লোক গুৰুতৰভাৱে আহত
চুৰিৰ উদ্দেশ্যে ঘৰত সোমাই পতি-পত্নীক হত্যা; ‘ডাবল মাৰ্ডাৰ’ৰ ঘটনাই কঁপাইছে কনৌজ