ডিজিটেল ডেস্কঃ বিদ্যালয়লৈ নোযোৱাকৈয়ে দৰমহা লয় বিজেপি বিধায়কৰ পত্নীয়ে। তেওঁ মাহত কেৱল এবাৰহে বিদ্যালয়ত উপস্থিত হয়। উত্তৰ প্ৰদেশৰ হামিৰপুৰৰ বিজেপি বিধায়ক মনোজ প্ৰজাপতিৰ পত্নী দেশপ্ৰাচী চক্ৰৱৰ্তীৰ বিৰুদ্ধে উত্থাপন হৈছে এই অভিযোগ।
হামিৰপুৰ সদৰৰ বিজেপি বিধায়ক প্ৰজাপতিৰ প্তনীয়ে এগৰাকী চৰকাৰী বিদ্যালয়ৰ শিক্ষয়িত্ৰী। তেওঁ চাকৰি পোৱা বিদ্যালয়খনো প্ৰজাপতিৰ পৈতৃক গাঁৱলৈ ওভতাই অনা হৈছে । দেশপ্ৰাচীয়ে প্ৰাথমিক বিদ্যালয় খনত সহকাৰী শিক্ষয়িত্ৰী হিচাপে কাম কৰি আছে। অভিযোগ কৰা হৈছে যে বিধায়ক-পত্নীয়ে নিজে বিদ্যালয়ত উপস্থিত নাথাকি গাওঁখনৰ এগৰাকী যুৱতীক মাহে ৫,০০০ টকাত 'ভাড়াতীয়া' শিক্ষয়িত্ৰী হিচাবে ব্যৱহাৰ কৰি আহিছে।
স্থানীয় লোকসকলৰ এটা অংশই অভিযোগ কৰিছে যে প্ৰজাপতি বিধায়ক হোৱাৰ পিছতে তেওঁৰ পত্নীয়ে এনে কৰা আৰম্ভ কৰিছে। মাহত এবাৰহে বিদ্যালয়লৈ গৈ তেওঁ বিদ্যালয়ৰ উপস্থিতি বহীত মাহটোৰ চহী কৰি আহে।বিদ্যালয়খনৰ প্ৰধান শিক্ষক পুষ্পা চাচানেও কৈছে যে বিধায়কগৰাকীৰ পত্নীয়ে মাহত এবাৰহে বিদ্যালয়লৈ আহে।তেওঁ গাওঁখনৰ এগৰাকী যুৱতী শ্ৰেয়া চাচানক শিক্ষাৰ্থীক শিকোৱাৰ দায়িত্ব দিছে।
বিদ্যালয়খনৰ শিক্ষাৰ্থীসকলেও লগতে দাবী কৰিছে যে দেশপ্ৰাচীয়ে মাহত এবাৰহে বিদ্যালয়লৈ আহে। সেই দিনটোতো তেওঁ অলপ সময়ৰ পিছতে বিদ্যালয়ৰ পৰা গুচি যায়। ঘটনাটো পোহৰলৈ অহাৰ লগে লগে উত্ত প্দেশৰ প্ৰাথমিক শিক্ষা পৰিষদত কঁপনি উঠিছে। ব'ৰ্ডৰ এজন জ্যেষ্ঠ বিষয়া আলোক সিঙে কয় যে বিষয়টো সন্দৰ্ভত তদন্ত চলি আছে। যদি সঁচাকৈয়ে এনে হৈছে, শিক্ষয়িত্ৰীগৰাকীৰ বিৰুদ্ধে ব্যৱস্থা লোৱা হ'ব বুলি তেওঁ কয়।
Continue Reading
