ডিজিটেল ডেস্কঃ যিকোনো মুহূৰ্ততে দেশত প্ৰযোজ্য হ’ব পাৰে নাগৰিকত্ব সংশোধনী আইন বা কা। বিশেষ সূত্ৰই প্ৰকাশ কৰা মতে আজি নিশাই জাৰি হ’ব পাৰে কাৰ অধিসূচনা। সেইমৰ্মে অসমকে ধৰি সমগ্ৰ দেশতে পানী নসৰকা নিৰাপত্তা বেহু গঢ়ি তোলা হৈছে।
বিশেষ সূত্ৰই প্ৰকাশ কৰা মতে আজি সন্ধিয়াৰ ভিতৰতে প্ৰধানমন্ত্ৰী নৰেন্দ্ৰ মোদীয়ে নাগৰিকত্ব সংশোধনী আইন সন্দৰ্ভত দেশবাসীক উদ্দ্যেশি এক বিবৃতি প্ৰকাশ কৰাৰ সম্ভাৱনা আছে। লোকসভা নিৰ্বাচন ২০২৪ ঘোষণাৰ আগতেই কেন্দ্ৰীয় চৰকাৰে দেশত নাগৰিকত্ব সংশোধনী আইন ২০১৯ (কা) কাৰ্যকৰী কৰাৰ প্ৰস্তুতি চলাই আছে।নাগৰিকত্ব সংশোধনী আইনে হিন্দু, শিখ, জৈন, বৌদ্ধ, পাৰ্চী আৰু খ্ৰীষ্টানসহ অ-মুছলমান অনুপ্ৰৱেশকাৰীসকলক ভাৰতীয় নাগৰিকত্ব প্ৰদান কৰিব বিচাৰিছে, যিসকলে ৩১ ডিচেম্বৰ, ২০১৪-ৰ আগতে ভাৰতত বসতি স্থাপন কৰিছিল।
বাংলাদেশ, পাকিস্তান আৰু আফগানিস্তানত উৎপীড়নৰ সন্মুখীন হৈ তেওঁলোকে ভাৰতত প্ৰৱেশ কৰিছিল। নাগৰিকত্ব সংশোধনী আইন ২০১৯ চনৰ ডিচেম্বৰ মাহত নানান বাদ-প্ৰতিবাদৰ মাজেৰে সংসদত গৃহীত কৰা হৈছিল। পৰৱৰ্তী সময়ত ৰাষ্ট্ৰপতিয়েও ইয়াত অনুমোদন লাভ কৰিছিল।
কেন্দ্ৰীয় গৃহ মন্ত্ৰী অমিত শ্বাহেও কৈ আহিছে যে কা শীঘ্ৰে কাৰ্যকৰী কৰা হ’ব আৰু লোকসভা নিৰ্বাচনৰ পূৰ্বে এখন জাননী জাৰি কৰা হ'ব।
(প্ৰিয় পাঠক, এয়া এটা ব্ৰেকিং নিউজহে। পৰৱৰ্তী সময়ত আমি এই বিষয়ত হোৱা সকলো শেহতীয়া খবৰ আপোনালোকক জনাই থাকিম। মাথো চকু ৰাখিব প্ৰাগ নিউজ ডিজিটেলত)
Continue Reading
