বিহাৰত পুনৰ ভাগি পৰিল নিৰ্মীয়মাণ দলং; দলঙৰ ভগ্নাংৱশেষৰ তলত শ্ৰমিক আবদ্ধৰ আশংকা

বিহাৰৰ বকোৰ আৰু মধুমণি জিলাৰ ভেজাৰ মাজত থকা দেশৰ দীৰ্ঘতম দলংখনৰ তিনিটাকৈ অংশ খহি পৰিছিল শুকুৰবাৰে পুৱা। যাৰফলত দলংখনৰ এক অংশ খহি পৰিছিল কোচি নদীৰ ওপৰত। ঘটনাৰ সময়ত দলংখনৰ ওপৰত কৰ্মৰত আছিল বহুসংখ্যক শ্ৰমিক। দলঙৰ ভগ্ন অংশৰ লগতে তলত পৰিছিল শ্ৰমিকসকল। যাৰ ভিতৰত থিতাতে মৃত্যু হৈছিল এজন শ্ৰমিকৰ। বিহাৰৰ কোচি নদীত নিৰ্মীয়মাণ অৱস্থাত আছে দেশৰ দীৰ্ঘতম দলংখন। যাৰ দৈৰ্ঘ হৈছে ১০.২ কিলোমিটাৰৰো অধিক। এপ্ৰ’ছ ৰোডৰ সৈতে দলংখনৰ মুঠ দৈৰ্ঘ্য হৈছে ১৩.৩ কিলোমিটাৰ। ২০২৩ চনতে নিৰ্মাণ সম্পূৰ্ণ হ’বলগীয়া দলংখনৰ এতিয়াও অব্যাহত আছে কাম। বকোৰৰ দিশৰ পৰা ট্ৰান্সৰে’ল লাইটিং লিমিটেড আৰু মধুবনি জিলাৰ দিশৰ পৰা গেমনে অব্যাহত ৰাখিছে দলংখনৰ নিৰ্মাণৰ কাম। যাৰ নিৰ্মাণ ব্যয় হৈছে ১২শ ৮৬ কোটি টকা। 

কিন্তু দলংখনৰ নিৰ্মাণৰ কাম নিম্ন পৰ্যায়ৰ বুলি ইতিপূৰ্বে বহুবাৰ অভিযোগ কৰি আহিছিল স্থানীয় অঞ্চলবাসীয়ে। কিন্তু সেই কথালৈ গুৰুত্ব নিদিয়া প্ৰশাসনৰ চকুৰ সমুখতে আজি ভাঙি পৰিল দীৰ্ঘতম দলঙৰ অংশ। এই ঘটনাৰ পাছতে শ্ৰমিকসকলৰ ক্ষতিপূৰণক লৈ সৃষ্টি হয় হাংগামাৰ। শ্ৰমিকসকল চিকিৎসাধীন হৈ থকা হাস্পতালখনৰ সন্মুখত সৃষ্টি হয় উত্তপ্ত পৰিস্থিতি। 

ইতিমধ্যে মৃতকৰ পৰিয়ালক ১০ লাখ টকাৰ সাহায্য প্ৰদান কৰিছে নিৰ্মাণৰ সৈতে জড়িত প্ৰতিষ্ঠানে। ইতিপূৰ্বেও বিহাৰত সংঘটিত হৈছিল অনুৰূপ ঘটনা। ২০২৪ চনৰ ৪ জুনত বিহাৰৰ ভাগলপুৰত গংগা নদীৰ ওপৰত ভাঙি পৰিছিল নিৰ্মীয়মাণ দলং। ১হাজাৰ ৭১০ কোটি টকাৰে নিৰ্মাণ কৰি থকা ছুলতানগঞ্জ–আগৱানিসংযোগী দলংখনৰ ৮০ শতাংশ কাম সম্পূৰ্ণ হোৱাৰ পাছত এনেদৰে ভাঙি পৰিছিল গংগা নদীৰ ওপৰত। 

একেদৰে ২০২৩ চনৰ ১৯ ফেব্ৰুৱাৰীত পাটনাত আৰু ১৬ জানুৱাৰীত বিহাৰৰ দৰভংগাত ভাঙি পৰিছিল আন দুখন দলং। যাৰ লগে লগে বিহাৰত উন্নয়নৰ নামত চলা ঠিকাদাৰীৰাজক লৈ উঠিছে প্ৰশ্ন।