ডিজিটেল ডেস্কঃ বিজেপি সাংসদৰ একাউণ্ট হেক। মধ্যপ্ৰদেশৰ গোৱালিয়ৰৰ সাংসদ বিবেক নাৰায়ণ শ্বেজৱালকাৰৰ ‘X’ (পূৰ্বৰ টুইটাৰ) একাউণ্ট হেক হয়। বিজেপি সাংসদগৰাকীৰ এক্স হেণ্ডেলৰ পৰা আৰবী ভাষাত বহুকেইটা পোষ্ট কৰে হেকাৰে। সম্প্ৰতি একাউণ্টটো পুনৰুদ্ধাৰ কৰাৰ প্ৰচেষ্টা অব্যাহত আছে।
চাইবাৰ বিশেষজ্ঞই হেকাৰৰ পৰা সাংসদগৰাকীৰ একাউণ্ট উদ্ধাৰৰ চেষ্টা চলাই আছে। ইয়াৰ লগতে ইয়াক ক’ৰ পৰা হেক কৰা হৈছে সেই কথাও জানিবলৈ চেষ্টা কৰা গৈছে। আশ্চৰ্যজনক কথাটো হ’ল এক্স একাউণ্ট হেক হোৱাৰ পিছত গোৱালিয়ৰৰ সাংসদ বিবেক নাৰায়ণ শ্বেজৱালকাৰৰ পুৰণি পোষ্টবোৰ দেখা পোৱা নাই। কেৱল হেকাৰে শ্বেয়াৰ কৰা ভিডিঅ’ আৰু ফটোহে দেখিবলৈ পোৱা গৈছে।
সাংসদগৰাকীৰ একাউণ্ট হেক কৰি অশ্লীল বিষয়বস্তু শ্বেয়াৰ কৰিছে হেকাৰে। স্পা আৰু বডি মাছাজৰ কেইবাটাও ভিডিঅ’ পোষ্ট কৰিছে হেকাৰে। অনুমান কৰা হৈছে যে ছৌদি আৰৱৰ এজন হেকাৰে সাংসদগৰাকীৰ অফিচিয়েল এক্স-হেণ্ডেল একাউণ্ট হেক কৰিছে।
অভিযোগ দাখিলৰ পাছতে সাংসদ বিবেকৰ একাউণ্ট উদ্ধাৰৰ চেষ্টা আৰম্ভ কৰিছে আৰক্ষীয়ে। আৰক্ষী বিষয়াৰ মতে বিশেষজ্ঞৰ সহায় লোৱা হৈছে। এই বিষয়টো শীঘ্ৰে সমাধান হ’ব। ইয়াৰ লগে লগে একাউণ্টটো হেক কৰা ব্যক্তিজন কোন সেয়া অতি সোনকালে গম পোৱা যাব। ছ’চিয়েল মিডিয়াৰ জৰিয়তে বিষয়টো পোহৰলৈ অহা বুলি গোৱালিয়ৰৰ আৰক্ষী অধীক্ষক ধৰমবীৰ সিং যাদৱে কয়। তদন্তৰ অন্তত আইনী ব্যৱস্থা গ্ৰহণ কৰা হ’ব।
Continue Reading
