ডিজিটেল ডেস্কঃ এয়াৰ ইণ্ডিয়াৰ বিমানত যাত্ৰীৰ ওপৰত সহ-যাত্ৰীয়ে প্ৰস্বাৱ কৰাৰ ঘটনাৰ প্ৰতিক্ৰিয়া মাৰ নৌযাওঁতেই এইবাৰ ৰে’লতো অনুৰূপ ঘটনা ঘটিছে৷ এইবাৰ ৰে’লৰ টিকট পৰীক্ষক এগৰাকীৰ বিৰুদ্ধে এগৰাকী মহিলা যাত্ৰীৰ ওপৰত প্ৰস্ৰাৱ কৰাৰ অভিযোগ উত্থাপিত হৈছে। অমৃতসৰৰ পৰা কলকাতালৈ যোৱা ৰে’লখনৰ অভিযুক্ত টিকট পৰীক্ষকজনক ৰে'ল আৰক্ষীক গতাই দিয়া হৈছে।
অভিযোগ উঠা মতে টিকট পৰীক্ষক জনে সুৰাপান কৰি আছিল৷ ঘটনাটো অমৃতসৰৰ পৰা কলকাতাঅভিমুখী অকাল তখত এক্সপ্ৰেছ ৰে’লত সংঘটিত হৈছে। অমৃতসৰৰ বাসিন্দা ৰাজেশ আৰু তেওঁৰ পত্নীয়ে ৰেলখনৰ এ-১ কম্পাৰ্টমেণ্টত আছিল। দেওবাৰে নিশা ৰাজেশৰ পত্নীয়ে অভিযোগ কৰে যে টিকট পৰীক্ষকে তেওঁৰ ওপৰত প্ৰস্ৰাৱ কৰি দিছে। নিচাগ্ৰস্ত অৱস্থাত টিকট পৰীক্ষক জনে অভদ্ৰ আচৰণ কৰাৰো অভিযোগ উত্থাপিত হৈছে।
সোমবাৰে পুৱা ৰাজেশে উত্তৰ প্ৰদেশৰ চাৰবাগৰ ওচৰত অভিযুক্তজনক ধৰি আৰক্ষীৰ হাতত গতাই দিয়ে।চাৰবাগৰ ৰে'ল আৰক্ষীৰ পৰিদৰ্শক নৱৰত্ন গৌতমে কয় যে মহিলাগৰাকীয়ে দেওবাৰে নিশা তেওঁৰ আসনত শুই আছিল। সেই সময়তে সুৰাপান কৰা টিকট পৰীক্ষকজনে তেওঁৰ মূৰতে প্ৰস্ৰাৱ কৰি দিয়ে । আন যাত্ৰীসকলে অভিযুক্তজনক ধৰিবলৈ সক্ষম হয়।
অভিযোগৰ ভিত্তিত ৰে'ল আৰক্ষীয়ে টিকট পৰীক্ষকজনৰ বিৰুদ্ধে তদন্ত আৰম্ভ কৰিছে। সেইদিনা তেওঁ সঁচাকৈয়ে নিচাগ্ৰস্ত আছিল নে নাই সেয়াও পৰীক্ষা কৰি থকা হৈছে৷ইয়াৰ পূৰ্বে এজন পুৰুষ সহযাত্ৰীয়ে এয়াৰ ইণ্ডিয়াৰ বিমানত এগৰাকী মহিলাৰ ওপৰত প্ৰস্ৰাৱ কৰাৰ অভিযোগ উত্থাপিত হৈছিল। পিছত তেওঁক গ্ৰেপ্তাৰ কৰা হৈছিল।
Continue Reading
