ডিজিটেল ডেস্কঃ সমগ্ৰ দেশবাসীৰ মাজত আৰু বিদেশতো ক্ৰিকেটাৰ মহেন্দ্ৰ সিং ধোনী কিমান জনপ্ৰিয় সেই কথা নিশ্চয়কৈ নতুনকৈ কোৱাৰ প্ৰয়োজন নাই। মাহী বুলি কলেই যেন সকলো মনৰ আনন্দত উন্মাদ হৈ পৰে।
ভাৰতীয় ক্ৰিকেট দলৰ প্ৰাক্তন অধিনায়ক তথা চেন্নাই ছুপাৰ কিংছৰ বৰ্তমানৰ অধিনায়কগৰাকী য’তেই যায় তাতেই তেওঁৰ অনুৰাগীয়ে তেওঁক খেদি ফুৰে। শেহতীয়াকৈ ক্ৰিকেট তাৰকাগৰাকীৰ এক ফটো আৰু ভিডিঅ ভাইৰেল হৈ পৰিছে। এক বিশেষ কামত বিমানেৰে ৰাঁচীৰ পৰা আন এখন চহৰলৈ গৈ আছিল ধোনী। বিমানতে টোপনি গৈছিল ক্ৰিকেটাৰগৰাকী। টোপনি গৈ থকাৰ অৱস্থাত মনে মনে মোবাইলত ধোনীৰ ছবি তুলিছিল এগৰাকী বিমান এয়াৰ হোষ্টেছে। তেওঁক দেখা পাই মনৰ আনন্দতে বিমানত তেওঁৰ ভিডিঅ’ ৰেকৰ্ডিং কৰিছিল এয়াৰ হোষ্টেছগৰাকীয়ে।
অৱশ্যে এয়াৰ হোষ্টেছগৰাকী এই কাণ্ডৰ বাবে তীব্ৰ সমালোচনাৰ সন্মুখীন হৈছে। ক্ৰিকেটাৰগৰাকীৰ ব্যক্তিগত সময়ত ৰেকৰ্ডিং কৰাত অসন্তুষ্ট হৈ পৰিছে ধোনীৰ অনুৰাগীসকল। ছ’চিয়েল মিডিয়াত ভাইৰেল হোৱা ভিডিঅ’টোত ধোনীক শান্তিৰে শুই থকা দেখা গৈছে, আনহাতে তেওঁৰ পত্নী সাক্ষী কিবা এটা কামত ব্যস্ত হৈ আছে।
উল্লেখ্য যে, এয়াৰ হোষ্টেছগৰাকী আছিল ধোনিৰ ডাঙৰ অনুৰাগী। কিন্তু কাৰোবাৰ গোপন মুহূৰ্তৰ ভিডিঅ’ লোৱাটো, তেওঁ যিমানেই ডাঙৰ চেলিব্ৰিটি নহওক কিয়, সেয়া সঠিক কাম নহয় বুলি সমালোচনা কৰিছে নেটিজেনসকলে।
ধোনীৰ এই ছবি ছচিয়েল মিডিয়াত ভাইৰেল হৈ পৰাৰ পাছতেই নেটিজেনৰ ৰোষত পৰিল এয়াৰ হোষ্টেছগৰাকী। একাংশ লোকে তেওঁক কৰিছে তীব্ৰ সমালোচনা আৰু কটাক্ষ। বহুতেই প্ৰশ্ন তুলিছে যে এনেকৈ অনুমতি নোহোৱাকৈ গোপনে আনৰ ছবি তোলাৰ অধিকাৰ কোনে দিলে বিমান এয়াৰ হোষ্টেছগৰাকীক। আনহাতে একাংশই এয়াৰ হোষ্টেছগৰাকীৰ পক্ষত মাত মাতি কয় যে প্ৰিয় তাৰকাগৰাকীক কাষতে পাই মনৰ আনন্দত এনে ফটো তোলাটো কোনো ডাঙৰ কথা নহয়।
Continue Reading
