বিমুদ্ৰাকৰণৰ সময়ত হাজাৰ হাজাৰ লোকৰ মৃত্যু হৈছিল, ইয়াৰ বাবে কোন দায়ী? ...বিমুদ্ৰাকৰণক অৰ্থনৈতিক সন্ত্ৰাসবাদ আখ্যা সাংসদ সঞ্জয় ৰাউতৰ

"প্ৰধানমন্ত্ৰী নৰেন্দ্ৰ মোদীয়ে ১,০০০ আৰু ৫০০ টকাৰ নোট বিমুদ্ৰাকৰণৰ কথা ঘোষণা কৰিছিল। ক'লা ধন নোবহোৱা কৰা , সন্ত্ৰাসবাদীৰ পুঁজি হ্ৰাস কৰা , সন্ত্ৰাসবাদীক যোগান ধৰা ধন বন্ধ কৰা , প্ৰচলিত নিচাজাতীয় সামগ্ৰীৰ বজাৰ আৰু জাল নোটৰ প্ৰচলন বন্ধ কৰা আদি কৰিবলৈ বিমুদ্ৰাকৰণ কৰা হৈছিল। কিন্তু সেয়া হ’লনে বুলিও ৰাউতে প্ৰশ্ন কৰে। তেওঁ কয় যে  সন্ত্ৰাসবাদ হ্ৰাস হোৱা নাই। সন্ত্ৰাসবাদীৰ পুঁজিও বন্ধ হোৱা নাই । বিমুদ্ৰাকৰণ কিমান আইনী সেয়া মানুহৰ মনত এটা প্ৰশ্ন হৈয়েই আছে। উল্লেখ্য উচ্চতম ন্যায়ালয়ে শেহতীয়াকৈ বিমুদ্ৰাকৰণক প্ৰত্যাহ্বান জনাই দাখিল কৰা আৱেদনৰ শুনানি অনুষ্ঠিত কৰে৷ এক শুনানিত উচ্চতম ন্যায়ালয়ে কেন্দ্ৰৰ সিদ্ধান্তত কোনো ভুল নাছিল বুলি ৰায় প্ৰদান কৰে। উচ্চতম ন্যায়ালয়ে এইটোও কৈছিল যে কেন্দ্ৰীয় চৰকাৰৰ কোনো বিত্তীয় সিদ্ধান্ত সলনি কৰিব নোৱাৰি। 

উচ্চতম ন্যায়ালয়ে লক্ষ্য কৰিছিল যে সিদ্ধান্তটো কেনেদৰে লোৱা হৈছে সেয়া বিবেচনা কৰি কেন্দ্ৰৰ সিদ্ধান্ত সলনি কৰিব নোৱাৰি। ভাৰতীয় ৰিজাৰ্ভ বেংকৰ (আৰবিআই) সৈতে ছয় মাহৰ আলোচনাৰ পাছত কেন্দ্ৰই এই সিদ্ধান্ত গ্ৰহণ কৰিছিল। উচ্চতম ন্যায়ালয়ৰ সাংবিধানিক বিচাৰপীঠে ৰায়টো ঘোষণা কৰাৰ সময়ত এইদৰে কৈছিল। চাৰিজন ন্যায়াধীশে কেন্দ্ৰৰ সিদ্ধান্তৰ সপক্ষে আৰু এজনে ইয়াৰ বিৰুদ্ধে ভোট দিছিল।

বিমুদ্ৰাকৰণৰ সিদ্ধান্তক প্ৰত্যাহ্বান জনাই উচ্চতম ন্যায়ালয়ত প্ৰায় ৫৮খন আবেদন দাখিল কৰা হৈছিল। আবেদনকাৰীসকলে যুক্তি দিছিল যে চৰকাৰে সঠিক পৰিকল্পনাৰে এই সিদ্ধান্ত লোৱা নাছিল আৰু সিদ্ধান্তটো তৎক্ষণাৎ বাতিল কৰা উচিত। চৰকাৰৰ প্ৰতি-যুক্তি আছিল যে বাস্তৱত এই সিদ্ধান্ত বাতিল কৰা সম্ভৱ নহয়। ন্যায়াধীশ এছ.এ. নাজিৰৰ নেতৃত্বত পাঁচজনীয়া সাংবিধানিক বিচাৰপীঠে পূৰ্বে বাদী-বিৰোধীৰ যুক্তি শুনিছিল আৰু ৭ ডিচেম্বৰত ৰায়টো স্থগিত ৰাখিছিল।