ডিজিটেল ডেস্কঃ বিশিষ্ট লেখক, স্তম্ভ লেখক, অৱসৰপ্ৰাপ্ত বেংক বিষয়া অনন্ত কলিতা আৰু নাই। প্ৰগতিশীল চিন্তা-চৰ্চাৰে দেশ তথা জাতিৰ সংকটৰ মুহূৰ্তসমূহত নিজৰ কলমেৰে মানুহক পথৰ সন্ধান দিয়া অনন্ত কলিতাৰ দেওবাৰে পুৱা ৭ বজাত মৃত্যু ঘটে।বিশিষ্ট লেখকগৰাকীয়ে বিগত কিছুদিন ধৰি জটিল ৰোগত আক্ৰান্ত হৈ গুৱাহাটী মহানগৰীৰ নেমকেয়াৰ হাস্পতালৰ চিকিৎসকৰ পৰামৰ্শ অনুসৰি চলি আহিছিল। কিন্তু আজি পুৱা তেওঁৰ স্বাস্থ্যৰ অৱনতি ঘটে আৰু মৃত্যু ঘটে।
অনন্ত কলিতা এগৰাকী বেংকৰ কৰ্মচাৰী আছিল যদিও চাকৰিৰ সমান্তৰালভাবে তেওঁ লেখা-মেলাও অব্যাহত ৰাখিছিল।তেওঁ ষ্টেট বেংক অৱ ইণ্ডিয়াৰ উত্তৰ-পূৱ মণ্ডলৰ সঞ্চালক হিচাবে অৱসৰ গ্ৰহণ কৰিছিল। একাধিক প্ৰতিষ্ঠিত কাকতত তেওঁ বিভিন্ন সমসাময়িক বিষয়ত স্তম্ভ লিখিছিল। লেখক কলিতাৰ তেওঁৰ সদ্য প্ৰকাশিত কেইখনমান গ্ৰন্থ হৈছে- বিশ্বায়িত সমাজখনৰ ভিন্ন চিন্তা, নব্য-উদাৰ অৰ্থনীতি/বিকল্প অন্বেষণ, অসম আৰু অসমৰ জাতীয় সমস্যা। 
বিশিষ্ট লেখকগৰাকীয়ে চিকিৎসাবিজ্ঞানৰ গৱেষণাৰ বাবে মৃত্যুৰ পূৰ্বে তেওঁৰ দেহদান কৰি গৈছে। মহানগৰীৰ মঠঘৰীয়াস্থিত ষ্টেট বেংক কলনীৰ বাসিন্দা কলিতাৰ মৃত্যুৰ খবৰ বিয়পি পৰাৰ লগে লগে তেওঁৰ গুণমুগ্ধসকলৰ মাজত শোকৰ ছাঁ পৰে।
কলিতা মহানগৰীৰ মঠঘৰীয়াস্থিত ষ্টেট বেংক কলনীৰ বাসিন্দা আছিল।
বিশিষ্ট লেখকগৰাকীৰ মৃত্যুৰ খবৰ পোৱাৰ পিছতে তেখেতৰ হেঙেৰাবাৰীস্থিত বাসগৃহত আত্মীয়, সহকৰ্মী আৰু গুণমুগ্ধসকলে শ্ৰদ্ধাঞ্জলি জ্ঞাপন কৰে। নতুন সাহিত্য পৰিষদৰ কাৰ্যালয়তো কলিতাক শেষ বিদায় জনোৱা হয়। চিপিআই(এম) ৰ কাৰ্যালয়ত প্ৰয়াত কলিতাৰ প্ৰতি শ্ৰদ্ধাঞ্জলি জ্ঞাপন কৰে মাক্সবাদী নেতাসকলে।
Continue Reading
