ডিজিটেল ডেস্কঃ উত্তৰাখণ্ড উচ্চ ন্যায়ালয়ৰ ন্যায়াধীশ পংকজ পুৰোহিতৰ নেতৃত্বত গঠিত উচ্চ ন্যায়ালয়ৰ একক ন্যায়াধীশৰ বিচাৰপীঠে শেহতীয়াকৈ কৈছে যে কেৱল পিতৃয়েই নহয়, পিতৃ-মাতৃ উভয়েই সন্তানৰ লালন-পালনৰ বাবে দায়বদ্ধ। চিআৰপিচিৰ ধাৰা ১২৫-ৰ শেহতীয়া সংশোধনৰ আধাৰত খণ্ডপীঠে এই ৰায় দিয়ে।
অংশু গুপ্তাৰ নামৰ লোকজনে দাখিল কৰা আবেদনৰ শুনানি গ্ৰহণ কৰি আদালতে এই ৰায় দিয়ে। আবেদনখনত ২০১৩ চনৰ পাৰিবাৰিক আদালতৰ এক আদেশক প্ৰত্যাহ্বান জনাই দাখিল কৰা হৈছিল। পাৰিবাৰিক আদালতে লোকজনক পুত্ৰৰ ৰক্ষণাবেক্ষণৰ খৰচ হিচাবে ৃপ্ৰতি মাহে ২,০০০ টকা পৰিশোধ কৰিবলৈ নিৰ্দেশ দিছিল।১৯৯৯ চনত অংশু গুপ্তাই উধম সিং নগৰৰ বাসিন্দা নাথু লালৰ সৈতে বিবাহপাশত আৱদ্ধ হৈছিল। অংশু গুপ্তা এজন চৰকাৰী শিক্ষক। বিবাহৰ পিছত ২০০৬ চনত দম্পতীহালৰ বিচ্ছেদ হৈছিল। সেই সময়ত তেওঁলোক দুয়োৰে এটা পুত্ৰ আছিল।
আবেদনকাৰীৰ অধিবক্তা বিবেক ৰাস্তোগীয়ে কৈছিল যে পাৰিবাৰিক আদালতে অংশু গুপ্তাক শিশুটোৰ তত্বাৱধানৰ বাবে ধন পৰিশোধ কৰিবলৈ নিৰ্দেশ দিছিল।অধিবক্তা বিবেক ৰাস্তোগীয়ে কৈছিল যে নাথু লালে তেওঁৰ আৰ্থিক অৱস্থাৰ কথা উল্লেখ কৰি শিশুটোৰ বাবে গুণগত শিক্ষা, লালন-পালনৰ ব্যয় বহন কৰিবলৈ অক্ষম বুলি প্ৰকাশ কৰিছিল। ২০১৩ চনত পাৰিবাৰিক আদালতে অংশু গুপ্তাক শিশুটোৰ বাবে মাহে ২,০০০ টকাকৈ দিবলৈ নিৰ্দেশ দিছিল। অংশু গুপ্তাই সেই সময়ত মাহিলী ২৭,০০০ টকা দৰমহা লাভ কৰিছিল। অংশু গুপ্তাই পাৰিবাৰিক আদালতৰ সিদ্ধান্তক প্ৰত্যাহ্বান জনাই উচ্চ ন্যায়ালয়ত আবেদন জনাইছিল।
উচ্চ ন্যায়ালয়ে দুয়োপক্ষৰ কথা শুনি এই বিষয়ত সিদ্ধান্ত ঘোষণা কৰে। ন্যায়াধীশ পংকজ পুৰোহিতৰ আদালতে চিআৰপিচিৰ ধাৰা ১২৫ ৰ শেহতীয়া সংশোধনীৰ কথা উল্লেখ কৰি সন্তানৰ ভৰণ-পোষণৰ দায়িত্ব পিতৃ-মাতৃ উভয়ৰে বুলি ৰায় দিয়ে।
Continue Reading
