ডিজিটেল ডেস্কঃ মঙলবাৰে বিশ্বকাপত শ্ৰীলংকা আৰু পাকিস্তানৰ মুখামুখি হয়। সেই মেচখনত এটা কেচক লৈ বিৰাট বিতৰ্কৰ সৃষ্টি হৈছিল। কেইবাখনো ছবিৰ পৰা দেখা গৈছে যে বাউণ্ডাৰী লাইনডাল অলপ পিছলৈ ঠেলি দিয়া হৈছে। কিছু মুহূৰ্তৰ পিছত ইমাম উল হকে তাত এটা কেচ ধৰে। অভিযোগ উত্থাপন হৈছে যে পাকিস্তানী ফিল্ডাৰসকলে ইচ্ছাকৃতভাৱে বাউণ্ডেৰীৰ ৰছী পিছলৈ টানি কেচটো লৈছে।
মঙলবাৰৰ খেলখনত হাছান আলীৰ বলত কুশল মেণ্ডিছৰ কেচ ধৰিলে ইমামে। তাৰ পিছত বহু ক্ৰিকেট অনুৰাগীয়ে সেই মুহূৰ্তৰ ছবি ছ’চিয়েল মিডিয়াত পোষ্ট কৰিলে। দেখা যায় যে বাউণ্ডাৰীৰ ৰছীখন অলপ পিছুৱাই গৈছে। সাধাৰণতে পথাৰখনৰ যি অংশত এই ৰছী ৰখা হয়, সেই অংশৰ ঘাঁহবোৰ বগা হৈ পৰে। বাকী ঘাঁহবোৰ সেউজীয়া। ফলত সীমাৰ ৰছীডাল আগলৈ বা পিছলৈ গতি কৰিলে সহজে বুজিব পৰা যায় আৰু তৎক্ষণাত ৰছীডাল সঠিক স্থানলৈ অনা হয়।
কিন্তু পাকিস্তানৰ ক্ষেত্ৰত সেয়া নাছিল। কেচ ধৰাৰ পূৰ্বে একে ঠাইতে কেইবাগৰাকীও পাকিস্তানী ক্ৰিকেটাৰে ফিল্ডিং কৰা দেখা গৈছে। ইমামে যেতিয়া কেচটো ধৰিছিল তেতিয়া তেওঁ সীমাৰ ৰছীখন স্পৰ্শ কৰা নাছিল যদিও ছবিখনত দেখা গৈছে যে তেওঁৰ শৰীৰ য’ত আছিল সেই ঘাঁহবোৰ বগা। অৰ্থাৎ ৰছীডাল চাগে তাতেই ৰখা হৈছিল, যিটো তাৰ পিছৰ পৰা অলপ পিছলৈ ঠেলি দিয়া হৈছে।
এতিয়াও আইচিচিৰ পৰা কোনো আনুষ্ঠানিক মন্তব্য পোৱা নাই। কিন্তু অনুৰাগীসকল ক্ষুব্ধ হৈ পৰিছে। তেওঁলোকে পাকিস্তানক প্ৰতাৰক বুলি ক’বলৈ কুণ্ঠাবোধ কৰা নাছিল।
Continue Reading
