ডিজিটেল ডেস্কঃ বিশ্বকাপৰ পৰা অপ্ৰত্যাশিতভাৱে বাহিৰ হ’লেও নেইমাৰক শুভকামনা জনাইছে ফুটবলৰ কিংম্বদন্তি সম্ৰাট পেলেই। কিন্তু কিয় নেইমাৰক শুভেচ্ছাপ্ৰদান কৰিছে তিনিবাৰৰ বিশ্বকাপবিজয়ী ফুটবলাৰগৰাকীয়ে?
ইয়াৰ কাৰণ হৈছে ক্ৰ’ৱেশ্চিয়াৰ বিৰুদ্ধে কোৱাৰ্টাৰ ফাইনেলখনত পেলেৰ এটা অভিলেখ স্পৰ্শ কৰিলে নেইমাৰে। সেয়া হৈছে ব্ৰাজিলৰ হৈ ৭৭ তম গ’ল কৰাৰ অভিলেখ। এই অভিলেখ একমাত্ৰ পেলেৰ নামতে আছে। এতিয়া তাৰ স’তে যোগ হ’ল নেইমাৰ। নেইমাৰে মেচখনত এটা অনবদ্য গ’ল কৰে।
উল্লেখ্য যে চাও পাওলোৰ এলবাৰ্ট আইনষ্টাইন হস্পিতালত হাওঁফাওঁৰ সংক্ৰমণৰ বাবে ভৰ্তি হৈ আছে পেলে। যোৱা কিছুদিন ধৰি তেওঁৰ স্বাস্থ্যক লৈ অনুৰাগীমহল শংকিত হৈ থকাৰ মাজতে এতিয়া জানিব পৰা মতে, আগতকৈ অনেক সুস্থ হৈ উঠিছে পেলে। বিশ্বকাপৰ মেচসমূহো উপভোগ কৰি আছে কিংবদন্তিগৰাকীয়ে।
নেইমাৰক উদ্দেশ্যি সামাজিক মাধ্যমত পেলেই লিখে- “মই তোমাক বাঢ়ি অহা দেখিছো। তোমাক প্ৰতিদিন উৎসাহ যোগোৱাৰ চেষ্টা কৰিছো। শেষ পৰ্যন্ত তোমাক অভিনন্দন জনোৱাৰ সুযোগ পালো। ব্ৰাজিলৰ হৈ মোৰ গ’লসংখ্যা স্পৰ্শ কৰিছা তুমি।”
“ক্ৰীড়াবিদ হিচাপে আমাৰ প্ৰকৃত কাম হ’ল মানুহক অনুপ্ৰাণিত কৰা। সতীৰ্থকসকল অনুপ্ৰাণিত কৰা। ভৱিষ্যত প্ৰজন্মক অনুপ্ৰাণিত কৰা। যিসকলে আমাৰ সুন্দৰ খেলটোক ভালপায়, তেওঁলোকক অনুপ্ৰাণিত কৰা।”- নেইমাৰক উদ্দেশ্যি পেলেই লিখে।
আনহাতে, বিশ্বকাপৰ পৰা ব্ৰাজিল বাহিৰ হোৱাৰ বিষয়েও নেইমাৰক উদ্দেশ্যি সামাজিক মাধ্যমত লিখে পেলেই।
“দুৰ্ভাগ্যজনকভাৱে ব্ৰাজিলৰ ফুটবলৰ বাবে এতিয়া সুখৰ সময় নহয়। তথাপিও তুমি সকলো সময়ৰ বাবে অনুপ্ৰেৰণা। সময়ৰ লগে লগে আমাৰ উত্তৰাধিকাৰ যিমান বাঢ়িব, আমি সিমানেই শিকিম। প্ৰায় ৫০ বছৰ আগে মই অভিলেখটো গঢ়িছিলো। ইমানদিনে কোনেও মোৰ অভিলেখ চুব পৰা নাছিল। শেষত তুমি সেয়া পাৰিলা। নেইমাৰ, তোমাৰ অৰ্জনৰ মূল্য বহুত।”- পেলেই লিখে।
নেইমাৰৰ উপৰিও ফ্ৰান্সৰ তাৰকা কিলিয়ান এমবাপেলৈও শুভেচ্ছা প্ৰদান কৰে পেলেই। কিছুদিন পূৰ্বে এমবাপেই পেলেৰ আশুআৰোগ্যৰ কামনা কৰি টুইট কৰিছিল। তাৰ উত্তৰস্বৰূপে ধন্যবাদ জনায় পেলেই।
উল্লেখ্য যে চলিত বিশ্বকাপতে পেলেৰ আন এটা অভিলেখ ভংগ কৰিছে এমবাপেই। সেয়া হৈছে ২৪ বছৰ বয়স হোৱাৰ পূৰ্বেই বিশ্বকাপত মুঠ সাতটা গ’ল কৰাৰ অভিলেখ।
ইয়াৰ বাবে এমবাপেক শুভকামনা জনাইছে পেলেই। লিখে- “বিশ্বকাপত তুমি মোৰ আৰু এটা অভিলেখ ভংগ কৰাৰ বাবে বহুত সুখী হৈছো। এনেদৰেই খেলি থাকা বন্ধু।”
Continue Reading
