ডিজিটেল ডেস্কঃ পুনৰ ইতিহাসত গঢ়িলে পিটি ঊষাই। এইবাৰ ট্ৰেকত নহয়, দেশৰ অলিম্পিক সংস্থাৰ প্ৰথমগৰাকী মহিলা সভাপতি হিচাপে নিৰ্বাচিত হ’ল প্ৰাক্তন ক্ৰীড়াবিদগৰাকী। শনিবাৰে বিনা প্ৰতিদ্বন্দ্বিতাৰে সভাপতি নিৰ্বাচিত হয় ঊষা।
উল্লেখ্য যে ভাৰতৰ অলিম্পিক সংস্থাৰ সভাপতি নিৰ্বাচন আছিল ১০ ডিচেম্বৰত। ২৭ নৱেম্বৰত মনোনয়ন জমা দিয়াৰ শেষ তাৰিখ আছিল। নিৰ্বাচক কমিটিয়ে জনাইছিল যে ঊষাৰ বাদে আন কোনো প্ৰাৰ্থীয়ে মনোনয়ন দিয়া নাই। সেইবাবেই বিনা প্ৰতিদ্বন্দ্বিতাৰে সভাপতি হোৱাটো নিশ্চিত হৈ পৰে ঊষাৰ।
উল্লেখ্য যে পিটি ঊষা ভাৰতৰ অন্যতম এগৰাকী শ্ৰেষ্ঠ ক্ৰীড়াবিদ। ১৯৮২ চনৰ পৰা ১৯৯৪ চনলৈকে এছিয়ান গেমছত ১১টাকৈ পদক জিকিছিল ঊষাই। তাৰ ভিতৰত চাৰিটা আছিল সোণৰ পদক।
১৯৬৪ চনত কেৰেলাৰ কোঝিক’ডেত জন্ম লাভ কৰা পিটি ঊষাক ‘ভাৰতৰ ট্ৰেক আৰু ফিল্ড ৰাণী’ হিচাপেও আখ্যা দিয়া হয়। ক্ৰীড়ানৈপুন্যতাৰ বাবেই তেওঁক পদ্মশ্ৰী আৰু অৰ্জুন বঁটাৰেও সন্মানিত কৰা হৈছিল।
Continue Reading
