ডিজিটেল ডেস্কঃ বলীউডৰ তাৰকাৰ বিবাহে সদায় অনুৰাগীসকলক আকৰ্ষিত কৰি আহিছে। এইবাৰ, বলীউডৰ তাৰকাৰ সৈতে ৰাজনীতিকৰ মিলনৰ এক পৰ্ব আৰম্ভ হৈছে। অভিনেত্ৰী পৰিণীতি চোপ্ৰা আৰু ৰাজনীতিক ৰাঘৱ চাদ্ধাই এক নতুন যাত্ৰা আৰম্ভ কৰিবলৈ সাজু হৈছে।
আপৰ সাংসদ চাদ্ধাই বিয়াৰ আগতে পৰিণীতিক প্ৰথমবাৰৰ বাবে লগ পোৱাৰ অভিজ্ঞতাৰ বিষয়ে মুকলি কৈছে। ইউটিউবাৰ ৰণবীৰ আল্লাবাদিয়াৰ সৈতে হোৱা এক সাক্ষাৎকাৰত ৰাঘৱ চাদ্ধাই তেওঁৰ ৰোমান্টিক মুহূৰ্তৰ কথা উল্লেখ কৰিছে আৰু তেওঁ চোপ্ৰাক কেনেদৰে লগ পাইছিল সেয়াও ব্যক্ত কৰিছে। প্ৰথম সাক্ষাতক এক যাদুকৰী মুহূৰ্ত বুলি অভিহিত কৰি তেওঁ কয় যে তেওঁলোকে এক 'অতি সাধাৰণ ' ভাবে লগ পাইছিল আৰু তেওঁ ঈশ্বৰক তেওঁৰ জীৱনত পৰিণীতিক দিয়াৰ বাবে প্ৰতিদিনে ধন্যবাদ জনাই আহিছে। "মই অত্যন্ত সুখী যে মই তেওঁক মোৰ সংগী হিচাপে পাইছো। তেওঁক মোক দিয়াৰ বাবে মই প্ৰতিদিনে ভগৱানক ধন্যবাদ জনাইছো," চাদ্ধাই কয়।
জানিব পৰা মতে ৰাঘৱ চাদ্ধা আৰু পৰিণীতি চোপ্ৰাই ৰাজস্থানৰ উদয়পুৰত লীলা পেলেচত বিবাহ পাশত আৱদ্ধ হ'ব। পৰিয়াল আৰু বন্ধুবৰ্গৰ উপস্থিতিত বিবাহৰ উৎসৱ ১৭ ৰ পৰা ২৪ ছেপ্টেম্বৰলৈ চলিব বুলি জানিব পৰা গৈছে।
দুয়োকে ডিনাৰ ডেটৰ পিছত মুম্বাইৰ এখন ৰেষ্টুৰেণ্টৰ পৰা ওলাই অহা দেখা পোৱা গৈছিল। ৰাঘৱ-পৰিণীতাই মে’ মাহত তেওঁলোকৰ বাগদানৰ ফটো ছচিয়েল মিডিয়াত শ্বেয়াৰ কৰি তেওঁলোকৰ সম্পৰ্ক আনুষ্ঠানিক কৰি তুলিছিল। ৰাঘৱ আৰু পৰিণীতিয়ে নতুন দিল্লীৰ কাপুৰথালা হাইছত আঙুঠি বিনিময় কৰিছিল। আঙুঠি সলনি কৰাৰ অনুষ্ঠান শিখ পৰম্পৰা অনুসৰি সম্পন্ন হৈছিল। অনুষ্ঠানত অতিথিসকলৰ বাবে নানান সুস্বাদু খাদ্যৰে ৰাতিৰ আহাৰৰ ব্যৱস্থাও কৰা হৈছিল। ৰাঘৱ আৰু পৰিণীতিৰ বাগদান অনুষ্ঠানলৈ মুঠ ১৫০ জন লোকক আমন্ত্ৰণ জনোৱা হৈছিল।
প্ৰিয়ংকা চোপ্ৰাই তেওঁৰ ভগ্নীৰ বাগদান অনুষ্ঠানৰ বাবে আমেৰিকাৰ পৰা দিল্লীলৈ আহিছিল। আমাজনৰ কাৰ্যবাহী মেনেজাৰ থমাছ ডাৰ্কোৱিজও দিল্লীত উপস্থিত আছিল।
Continue Reading
