ডিজিটেল ডেস্কঃ এক ভয়ংকৰ দুৰ্ঘটনা। শুকুৰবাৰে পুৱাৰ ভাগত এখন গাড়ী দ’ খাৱৈত পৰি কমেও ৭ জন লোকৰ মৃত্যু হোৱাৰ লগতে দুজন লোক আহত হয়। বিবাহ অনুষ্ঠানৰ পৰা ঘৰলৈ উভতি আহি থকা অৱস্থাত সংঘটিত হয় এই দুৰ্ঘটনা। দুৰ্ঘটনাৰ কাৰণ এতিয়াও জানিব পৰা হোৱা নাই। ওড়িশাৰ সম্বলপুৰ জিলাত সংঘটিত হৈছে এই দুৰ্ঘটনা।
ঘটনাস্থলীত উপস্থিত হোৱা উপ-কালেক্টৰ প্ৰভাস ডান্সেনাই কয় যে বিবাহ অনুষ্ঠানত অংশ লৈ উভতি আহিছিল লোককেইজন। তেতিয়াই এই দুৰ্ঘটনা সংঘটিত হয়। চালকজনে গাড়ী চলাই থকা অৱস্থাত টোপনি আহি যোৱাৰ বাবে এই দুৰ্ঘটনা সংঘটিত হোৱা হোৱাৰ সম্ভাৱনা ব্যক্ত কৰিছে আৰক্ষীয়ে।
স্থানীয় সংবাদ মাধ্যমৰ বাতৰি অনুসৰি শুকুৰবাৰে মাজনিশা প্ৰায় ২ বজাত এই দুৰ্ঘটনা সংঘটিত হয়। আৰক্ষীয়ে জনোৱা মতে, ঝাৰছুগুদা জিলাৰ বদাধৰাৰ পৰা এখন এছ ইউ ভি গাড়ীত বিয়া খাই নিজৰ ঘৰলৈ গৈ গৈ আছিল। তেওঁলোকৰ বাহনখন তীব্ৰ বেগেৰে চলি থকা অৱস্থাত হঠাতে চালকজনে গাড়ীখনৰ ওপৰত নিয়ন্ত্ৰণ হেৰুৱাই পেলায়।
যাৰ ফলত চাচন আৰক্ষী থানা অঞ্চলৰ অন্তৰ্গত পৰমানপুৰ গাঁৱৰ ওচৰত গাড়ীখন দুৰ্ঘটনাত পতিত হয় আৰু এটা দ’ খাৱৈত পৰি যায় গাড়ীখন। আৰক্ষীয়ে ৭টাকৈ মৃতদেহ উদ্ধাৰ কৰি আহত লোকদুজনক চিকিৎসালয়লৈ প্ৰেৰণ কৰে। জিলা দণ্ডাধীশে জনোৱা মতে, মৰণোত্তৰ পৰীক্ষাৰ পিছত মৃতদেহ আত্মীয়ক গতাই দিয়া হ’ব। এই ঘটনাই অঞ্চলটোত গভীৰ শোকৰ ছাঁ পেলাইছে।
Continue Reading
