ডিজিটেল ডেস্কঃ বিবাহপাশত আৱদ্ধ হ’ল বলীউডৰ অভিনেত্ৰী স্বাৰা ভাস্কৰ। যোৱা ৬ জানুৱাৰীত সমাজবাদী পাৰ্টিৰ যুৱ নেতা ফাহাদ আহমেদৰ সৈতে বৈধভাৱে বিবাহপাশত আৱদ্ধ হৈছিল অভিনেত্ৰীগৰাকীয়ে। বৃহস্পতিবাৰে আদালতৰ ৰেজিষ্টাৰ ৰুমৰ বাহিৰত বিয়াৰ ভিডিঅ’ নিজৰ অনুৰাগীৰ সৈতে শ্বেয়াৰ কৰে স্বাৰাই।
আইনী বিয়াৰ ভিডিঅ’টো সকলোৰে সৈতে শ্বেয়াৰ কৰি ‘তনু ৱেডছ মনু’ অভিনেত্ৰীগৰাকীয়ে লিখিছে, ''বহু সময়ত আমি এনেকুৱা কিবা এটা বিচাৰো যিটো আমাৰ চকুৰ সন্মুখতে থাকে, কিন্তু আমি বহু দূৰলৈ চাই থাকোঁ। আমি প্ৰেম বিচাৰি আছিলো। কিন্তু বন্ধুত্ব বিচাৰি পালোঁ। ইয়াৰ পিছত আমি ইজনে সিজনক বিচাৰি পালোঁ। মোৰ হৃদয়লৈ স্বাগতম ফাহাদ।’’
বিভিন্ন ৰাজনৈতিক মঞ্চত বাৰে বাৰে দেখা গৈছিল দুয়োকে। ৰাজনীতিৰ মঞ্চত প্ৰথম লগ পোৱা নেকি? স্বাৰাৰ দ্বাৰা নিৰ্মিত এই ভিডিঅ'টোৱে তাকেই কৈছে। ভিডিঅ’টোত প্ৰথমবাৰৰ বাবে মঞ্চত কথা কোৱাৰ পৰা আৰম্ভ কৰি সকলো মুহূৰ্ত শ্বেয়াৰ কৰিছে অভিনেত্ৰীগৰাকীয়ে। ইয়াৰ পূৰ্বে তেওঁৰ ইনষ্টাগ্ৰামত প্ৰেমৰ আভাস পোৱা গৈছিল যদিও প্ৰেমিক কোন অনুৰাগীসকলে গম পোৱা নাছিল।
বহুতে ভাবিছিল যে স্বাৰাই লেখক হিমাংশু শৰ্মাৰ স’তে সম্পৰ্কত আছে। অৱশেষত এতয়া সত্যটো ওলাই পৰিল। স্বাৰাৰ বিবাহৰ খবৰ বিয়পি পৰাৰ লগে লগে অভিনেত্ৰী গৰাকীৰ ছ’চিয়েল মিডিয়া পেজত অনুৰাগীৰ শুভেচ্ছাৰে উপচি পৰিছে।
