ডিজিটেল ডেস্ক : সম্প্ৰতি আলিয়া
ভট্টই বলীউডত ১০ বছৰ সম্পূৰ্ণ কৰিছে। মহেশ ভট্টৰ কন্যাই এই উদ্যোগত প্ৰৱেশ কৰে কৰণ
জোহৰৰ ‘বছৰৰ ছাত্ৰ’ ছবিখনেৰে। সকলোৱে জানে যে বলীউডত আলিয়াক সুযোগ দিছিল কৰ্ণেই, কিন্তু
সেই সুযোগ নাপালে আলিয়াৰ ভাগ্য কোন দিশলৈ গতি কৰিলেহেঁতেন৷ কাৰণ তেওঁক লৈ পৰিয়ালত
অন্য পৰিকল্পনাহে আছিল।
শেহতীয়াকৈ ইনষ্টাগ্ৰামত মাতৃ ছোনী ৰাজদানে এটা পোষ্ট কৰি কন্যাই বলীউডত ১০ বছৰ সম্পূৰ্ণ কৰাৰ কথা সদৰী কৰে আৰু তেওঁলোকে আলিয়াৰ বাবে কি পৰিকল্পনা কৰিছিল সেই কথা স্পষ্টভাৱে প্ৰকাশ কৰিলে। মাতৃয়ে লিখিছে, ‘তেতিয়া আলিয়াই বিদেশত পঢ়িবলৈ যোৱাৰ প্ৰস্তুতি চলাই আছিল। আমি কেতিয়াও সপোনতো ভবা নাছিলো যে তেওঁ চিনেমাত অভিনয় কৰিব। প্ৰথমতে আমি ভাবিছিলো যে তেওঁক প্ৰথমে অভিনয়ৰ বাবে অধ্যয়ন কৰিবলৈ বিদেশলৈ পঠিয়াওৱা কথা। পাছতহে আলিয়াই ঘূৰি আহি অভিনয়ৰ সুযোগ লাভ কৰিব।
পোষ্টটোত ছোনীয়ে লগতে উল্লেখ কৰিছে যে ‘কৰণে সুযোগ নিদিলে আলিয়াৰ কেৰিয়াৰে আজি বেলেগ পথে গতি কৰিলেহেঁতেন। ছোনীয়ে লিখিছে, ‘আমাৰ কণমানি আলিয়াক অডিচন লৈ সুবিধা দিয়াৰ বাবে কৰ্ণক অশেষ ধন্যবাদ। আলিয়াৰ বাবে মই ইমানেই সুখী যে তাই আপোনাক গুৰু, বেষ্ট ফ্ৰেণ্ড আৰু অভিভাৱক হিচাপে লৈছে।’
আলিয়া এতিয়া গৰ্ভৱতী। কাপুৰ আৰু ভট্ট পৰিয়ালৰ দৰে অভিনেত্ৰীগৰাকীৰ অনুৰাগীসকলেও আগ্ৰহেৰে অপেক্ষা কৰি আছে এই সুখবৰটোৰ বাবে। অহা বছৰ মুক্তি পাব ৰণবীৰ সিঙৰ সৈতে ‘ৰকি ঔৰ ৰাণী কী প্ৰেম কাহানী’। আলিয়াই ইতিমধ্যে আন্তঃৰাষ্ট্ৰীয় ছবি ‘হাৰ্ট অব ষ্টোন’ৰ শ্বুটিং সম্পূৰ্ণ কৰিছে।
