বলীউডত খোজ পেলাবলৈ সাজু শ্বাহৰুখ কন্যা ছুহানা খান;ছবি পৰিচালনা কাৰ?

ডিজিটেল ডেস্কঃ বলীউডৰ বাদশ্বাহ শ্বাহৰুখ খানৰ মৰমৰ কন্যা ছুহানা খানক লৈ ছ’চিয়েল মিডিয়াত চলিছে চৰ্চা। বলীউড কিং শ্বাহৰুখ খানৰ কন্যা ছুহানা খান সোনকালেই বলীউডত আত্মপ্ৰকাশ কৰিবলৈ সাজু হৈছে। পিতৃৰ পদাংক অনুসৰণ কৰি নিজকে অভিনেত্ৰী হিচাপে গঢ়িবলৈ মন মেলিছে ২১ বছৰীয়া ছুহানা খানে। ছুহানাই জয়া আখটাৰৰ পৰিচালিত 'দ্য আৰ্চিছ'ৰ জৰিয়তে অভিনয় পথাৰত খোজ পেলাব। কেইসপ্তাহমান পূৰ্বে ষ্টাৰ কিড ছুহানাক জয়াৰ কাৰ্যালয়ৰ বাহিৰত দেখা গৈছিল। ইয়াৰ পাছতেই ছুহানাৰ বলীউডত আত্মপ্ৰকাশৰ বিষয়ে আলোচনা তীব্ৰতৰ হয়। শেহতীয়াকৈ ছুহানা খান, অমিতাভ বচ্চনৰ নাতি অগষ্ট্য নন্দা আৰু জয়া আখটাৰৰ ফটো আৰু ভিডিঅ' ছচিয়েল মিডিয়াত ভাইৰেল হৈ আছে। ইয়াৰ পৰা অনুমান কৰা হৈছে যে 'দ্য আৰ্চিছ' চিনেমাখনৰ প্ৰস্তুতি আৰম্ভ হৈছে। এই চিনেমাখন অটিটি প্লেটফৰ্ম নেটফ্লিক্সযোগে মুক্তি দিয়া হ'ব। ছবিখনত অগষ্ট্য নন্দাক সুহানাৰ সৈতে ৰোমাঞ্চ কৰা দেখা যাব। অৱশ্যে অধিক বিৱৰণ এতিয়াও আহিবলৈ বাকী আছে। ছবিখনত ছুহানাক পশ্চিমীয়া আৰু ভাৰতীয় দুয়োটা লুকতে দেখা যাব। কিং খানৰ কন্যাই বলীউডত ৰাজত্ব কৰিব পাৰিব নে নাই সেয়াহে হ'ব লক্ষ্যণীয়। উল্লেখ্য যে সুহানা খান ছ'চিয়েল মিডিয়াত যথেষ্ট সক্ৰিয়। তেওঁ প্ৰায়ে নিজৰ বিভিন্ন ভংগীমাৰ ফটো, ভিডিঅ' অনুৰাগীসকলৰ বাবে শ্বেয়াৰ কৰি থাকে। সাধাৰণতে ছ’চিয়েল মিডিয়াত ছুহানা নিজৰ ষ্টাইলৰ কাৰণে খুবেই জনপ্ৰিয়। আবেদনময়ী ছুহানাক ফ’ল’ কৰাৰ লোকৰ সংখ্যাও ছ’চিয়েল মিডিয়াত কম নহয়। আৰু পঢ়কঃ নিৰ্বাচনৰ দায়িত্ব পালন কৰিবলৈ আকৌ আহিছে ‘হালধীয়া শাৰী পিন্ধা মেডাম’! এইবাৰো ভাইৰেল