ডিজিটেল ডেস্কঃ বলিউডৰ জনপ্ৰিয় সংগীত পৰিচালক তথা কণ্ঠশিল্পী শংকৰ মহাদেৱনক ইংলেণ্ডৰ বাৰ্মিংহাম চিটি ইউনিভাৰ্চিটি (বিচিইউ)ৰ পৰা সন্মানীয় ডক্টৰেট ডিগ্ৰী প্ৰদান কৰা হৈছে। সংগীত আৰু কলাক্ষেত্ৰলৈ আগবঢ়োৱা অৱদানৰ স্বীকৃতি স্বৰূপে এই সন্মান আগবঢ়োৱা হৈছে।
শনিবাৰে বাৰ্মিংহামত অনুষ্ঠিত এক অনুষ্ঠানত বিশ্ববিদ্যালয়খনৰ উপাচাৰ্য অধ্যাপক ফিলিপ প্ল’ডেনৰ পৰা এই সন্মান লাভ কৰে ৫৬ বছৰীয়া কণ্ঠশিল্পীগৰাকীয়ে।
বিশ্বব্যাপী প্ৰশংসিত বলীউডৰ গায়ক, সুৰকাৰ তথা অভিনেতা শংকৰ মহাদেৱনে সংগীত আৰু কলাক্ষেত্ৰত আগবঢ়োৱা অসাধাৰণ অৱদানৰ স্বীকৃতি স্বৰূপে বাৰ্মিংহাম চিটি ইউনিভাৰ্চিটিৰ পৰা সন্মানীয় ডক্টৰেট ডিগ্ৰী লাভ কৰিছে বুলি বিশ্ববিদ্যালয়খনে প্ৰকাশ কৰিছে। চলিত বৰ্ষৰ আৰম্ভণিতে ৱেষ্ট মিডলেণ্ডছৰ মেয়ৰ এণ্ডি ষ্ট্ৰীটৰ নেতৃত্বত মুম্বাইলৈ বাণিজ্যিক প্ৰতিনিধি দলৰ সময়ত এই বঁটা ঘোষণা কৰা হৈছিল।
ডক্টৰেট সন্মান লাভ কৰি মহাদেৱনে কয়- ''সঁচাকৈয়ে মোৰ বাবে এইটো এটা বিশেষ মুহূৰ্ত। নতুন কথা আৰু এই অনুভৱ হজম কৰিবলৈ মোৰ কিছু সময় লাগিব। কেৰিয়াৰ আৰম্ভ কৰাৰ সময়ত মই কেতিয়াও ভবা নাছিলো যে এদিন মোক সংগীতৰ বাবে ডক্টৰেট ডিগ্ৰী প্ৰদান কৰা হ’ব। মই প্ৰতিনিধিত্ব কৰা ভাৰতীয় সংগীতজ্ঞ আৰু ৱেষ্ট মিডলেণ্ডছৰ সংগীতজ্ঞসকলৰ মাজত কিছুমান আচৰিত সংগীতৰ সৃষ্টি হ’বলৈ আগ্ৰহী।’’
উল্লেখ্য যে এজন নিপুণ অভিযন্তাৰ পৰা সংগীতজ্ঞলৈ পৰিণত হোৱা মহাদেৱনে ইণ্ডিপপ, চলচ্চিত্ৰ, লোক আৰু আধ্যাত্মিক সংগীতৰ লগতে ভাৰতীয় শাস্ত্ৰীয় সংগীত, জাজ আৰু বিশ্ব সংগীতকো সামৰি লৈ বলিউডত খোপনি পুতিছিল। ২০১৯ চনত তেওঁক পদ্মশ্ৰী বঁটা প্ৰদান কৰা হয়। বলিউডৰ কেইবাখনো চিনেমাৰ জনপ্ৰিয় সংগীতৰ স্ৰষ্টা শংকৰ মহাদেৱন 'শংকৰ-এহছান-লয়’ গ্ৰুপৰো সদস্য।
\
