ডিজিটেল ডেস্কঃ কেৰিয়াৰৰ আৰম্ভণিতে বলিউডত বৈষম্যৰ বলি হৈছিল প্ৰিয়ংকা চোপ্ৰা! শেহতীয়াকৈ অভিনেত্ৰীগৰাকীয়ে আন্তঃৰাষ্ট্ৰীয় সংবাদ মাধ্যম বিবিচিৰ এশগৰাকী নাৰীৰ মাজত স্থান লাভ কৰিছে। বিবিচিক দিয়া এটা সাক্ষাৎকাৰত প্ৰিয়ংকা চোপ্ৰাই কেতবোৰ বিস্ফোৰক বক্তব্য দাঙি ধৰিছে।
“বলিউডত মোক উচিত পৰিমাণৰ মাননি দিয়া হোৱা নাছিল। মোৰ পুৰুষ সহ-অভিনেতাসকলে লাভ কৰা পৰিশ্ৰমিকৰ দহ শতাংশহে মোক দিয়া হৈছিল।”- প্ৰিয়ংকাই কয়।
“এতিয়াও বলিউডত বহুতো অভিনেত্ৰীয়ে এই বৈষম্যৰ মুখামুখি হৈছে। মই যদি এতিয়া বলিউডত অভিনয় কৰি থাকিলোহেঁতেন, মোৰো একে হ’লহেঁতেন।”- তেওঁ কয়।
প্ৰিয়ংকাই জনায় যে তেওঁৰ সমসাময়িক আন বহুতো অভিনেত্ৰীয়ে পুৰুষ অভিনেতাৰ সমপৰিমাণৰ পৰিশ্ৰমিক দাবী কৰি আহিছিল। কিন্তু এইসমূহে কোনো ফল নধৰিছিল।
আনহাতে, পুৰুষ আৰু মহিলাৰ মাজত থকা বৈষম্যৰ বিষয়ে পৰিশ্ৰমিকৰ উপৰিও আন কেতবোৰ উদাহৰণো প্ৰিয়ংকাই দাঙি দৰে। কয় যে তেওঁৰ কেৰিয়াৰৰ আৰম্ভণিৰ সময়ছোৱাত ছৱিৰ শ্বুটিংস্থলীতো পুৰুষ অভিনেতাসকলেই প্ৰাধান্য লাভ কৰিছিল। পুৰুষ অভিনেতাসকলৰ পচন্দ অনুযায়ীয়েই শ্বুটিং কৰা হৈছিল।
উল্লেখ্য যে বলিউডৰ পৰা হলিউডলৈ যোৱাৰ পাছত প্ৰিয়ংকাই শেহতীয়াকৈ ‘চিটাডেল’ নামৰ এখনি ছৱিৰ কামত ব্যস্ত হৈ আছে। বলিউডত লাভ কৰা বৈষম্যৰ বিষয়ে মুখ খোলাৰ পাছতে ইয়াক তীব্ৰ চৰ্চা চলিছে।
