ডিজিটেল ডেস্কঃ এখন বিয়া সুন্দৰকৈ সম্পন্ন হৈ আছিল। ৰীতি-নীতি মতে চলি আছিল বিয়াৰ সকলো কাম-কাজ। এইবাৰ আহিল দৰা-কইনাই বৰমালা পিন্ধোৱাৰ পৰ্ব। বৰমালা পিন্ধোৱাৰ সময়তে দৰাই কইনাক কৰিলে চুম্বন। তাতে ঘটিল অথন্তৰ। মুকলিকৈ সকলোৰে আগত কইনাক চুমা খোৱাক লৈ কইনাঘৰীয়া জাঙুৰ খাই উঠিল।
কইনাঘৰীয়াই দৰঘৰীয়া মানুহক মাৰপিট কৰিবলৈ আৰম্ভ কৰিলে। দৰা পক্ষৰ মানুহেও কইনা ঘৰৰ মানুহক শিলগুটি নিক্ষেপ কৰিবলৈ ধৰিলে। এই ঘটনাই বিয়াৰ সকলো আনন্দ মুহূৰ্ততে পানী পানী কৰি দিলে। মাৰপিটত কেইবাজনো লোক গুৰুতৰভাৱে আহত হয়।
বিষয়টো গৈ এতিয়া আৰক্ষীৰ কাষ চাপিছে। এই ঘটনা সংঘটিত হৈছে উত্তৰ প্ৰদেশৰ হাপুৰত।
তথ্য অনুসৰি হাপুৰ দেহাত অঞ্চলৰ মহল্লা অশোকনগৰত বিবাহ অনুষ্ঠান চলি আছিল, বৰমালা পিন্ধোৱাৰ সময়তে দৰাজনে সকলোৰে সন্মুখত কইনাক চুমা খাইছিল। দৰাৰ এই কাৰ্য্যই কইনাৰ পক্ষৰ মানুহক ক্ষুব্ধ কৰি তুলিছিল। দৰাকে ধৰি বিয়াৰ আলহীক মাৰপিট কৰিবলৈ ধৰিলে কইনাঘৰীয়াই।
অলপ সময়ৰ ভিতৰতে দুয়োপক্ষৰ মাজত তীব্ৰ কাজিয়া আৰম্ভ হয়। দৰাৰ ফালৰ পৰা ক্ষুব্ধ লোকেও কইনাৰ ফালৰ লোকক আক্ৰমণ কৰে। লাঠি, ৰড শিলগুটিৰে আক্ৰমণ চলে। ইয়াৰ ফলত কেইবাজনো লোক আহত হয়। এই যুঁজৰ তথ্য লাভ কৰাৰ লগে লগে আৰক্ষী সেই স্থানত উপস্থিত হৈ আটাইকেইজন আহতক স্থানীয় চিকিৎসালয়ত ভৰ্তি কৰে আৰু দুয়োপক্ষৰ সাতজন লোকক জিম্মাত লয়।
উল্লেখযোগ্য যে এই ঘটনাৰ পাছত দৰাঘৰীয়া খালী হাতেৰে উভতি যায়। আৰক্ষীয়ে জনোৱা মতে, শান্তি ভংগৰ বাবে ১৫১ ধাৰাত ব্যৱস্থা গ্ৰহণ কৰা হৈছে।
অৱশ্যে পৰিস্থিতি শান্ত হোৱাৰ পাছত সেই দৰাৰ লগতে কইনাৰ বিবাহ সম্পন্ন হয়।
এতিয়া এই ঘটনাটো অঞ্চলটোত চৰ্চাৰ বিষয় হৈ পৰিছে।
Continue Reading
