বন্ধ কৰা হওক কংগ্ৰেছৰ টুইটাৰ একাউণ্ট! কিয় বাংগালুৰু আদালতে এই নিৰ্দেশ দিলে?

ডিজিটেল ডেস্কঃ বন্ধ কৰা হওক কংগ্ৰেছৰ অফিচিয়েল টুইটাৰ একাউণ্ট। কংগ্ৰেছৰ উপৰিও ৰাহুল গান্ধীৰ ‘ভাৰত জোড়ো যাত্ৰা’ৰ টুইটাৰ একাউণ্টটোও বন্ধ কৰা হওক। এই নিৰ্দেশ জাৰি কৰিছে বাংগালুৰুৰ এখন আদালতে।

আদালতৰ এই নিৰ্দেশৰ মূলতে আছে কংগ্ৰেছৰ বিৰুদ্ধে কেজিএফ-২ চিনেমাখনৰ এটি জনপ্ৰিয় গানৰ কপিৰাইট ভংগৰ অভিযোগ। চিনেমাখনৰ সংগীত নিৰ্মাণকাৰী সংস্থা এমআৰটি মিউজকৰ মেনেজাৰ নবীন কুমাৰৰ এখন আবেদনৰ ভিত্তিত আদালতে এই নিৰ্দেশ জাৰি কৰিছে।

আদালতে দিয়া নিৰ্দেশ অনুযায়ী সাময়িকভাৱে কংগ্ৰেছ আৰু ভাৰত জোড়ো যাত্ৰাৰ টুইটাৰ একাউণ্টটো বন্ধ কৰি ৰখা হওক।

উল্লেখ্য যে ভাৰত জোড়ো যাত্ৰাৰ এটা ভিডিঅ’ত ৰাহুল গান্ধীক লৈ কেজিএফ-২ৰ এটা গান ব্যৱহাৰ কৰা হৈছিল। তাৰপাছতে সংগীত নিৰ্মাণকাৰী সংস্থাটোৱে গোচৰ তৰে।

সংস্থাটোৱে তিনিজনকৈ কংগ্ৰেছ নেতা- ৰাহুল গান্ধী, জয়ৰাম ৰমেশ আৰু সুপ্ৰিয়াৰ বিৰুদ্ধে গোচৰ তৰিছিল।