ট্ৰ’ল-সমালোচনাৰ প্ৰতি নতশিৰ! পিচুওৱা হ’ল প্ৰভাসৰ ‘আদিপুৰুষ’ৰ মুক্তিৰ তাৰিখ

ডিজিটেল ডেস্কঃ পিচুৱাই দিয়া হ’ল ‘আদিপুৰুষ’ৰ মুক্তিৰ তাৰিখ। দক্ষিণ ভাৰতৰ চুপাৰষ্টাৰ প্ৰভাস অভিনীত বলিউডৰ ছৱিখনৰ টিজাৰ মুক্তি পোৱাৰ পাছত ব্যাপক ট্ৰ’ল-সমালোচনাৰ সন্মুখিন হৈছিল। তাৰপাছতে সোমবাৰে ছৱিখনৰ পৰিচালক ওম ৰাউটে এটা বিবৃত্তি প্ৰকাশ কৰি মুক্তি পিচুৱাই দিয়াৰ কথা ঘোষণা কৰিছে।

পৰিচালকগৰাকীয়ে লিখিছে যে আদিপুৰুষ কেৱল এখন ছৱিয়েই নহয়, বৰঞ্চ প্ৰভু শ্ৰীৰাম আৰু আমাৰ সংস্কৃতি আৰু ইতিহাসৰ প্ৰতি শ্ৰদ্ধাশীল প্ৰতিফলন। সেয়ে দৰ্শকক ডাঙৰ পৰ্দাত সুন্দৰ অভিজ্ঞতা দিবলৈ ছৱিখনত আৰু সময় দিব লাগিব।

সেইমৰ্মে মুক্তিৰ তাৰিখ ১৬ জুন ধাৰ্য কৰা হৈছে। পৰিচালকগৰাকীয়ে কয় যে তেওঁলোকে এনে এখন চিনেমা নিৰ্মাণ কৰিব, যাৰ দ্বাৰা দেশ গৰ্বিত হ’ব।

‘ৰামায়ণ’ৰ কাহিনীক ভিত্তি কৰি নিৰ্মাণ কৰা বিগ বাজেটৰ ছৱিখনত প্ৰভাসৰ উপৰিও চঈফ আলি খান, কৃতি সাননেও অভিনয় কৰিছে। ছৱিৰ টিজাৰ মুক্তি পোৱাৰ পাছতে নিৰ্মাণশৈলীক লৈ ব্যাপক সমালোচনাৰ জোৱাৰ উঠিছিল।