ডিজিটেল ডেস্কঃ বৰ্ষাপাৰা ষ্টেডিয়ামত এটা নতুন দৃশ্যৰ সাক্ষী হৈ ৰ’ল দৰ্শকসকল৷ প্ৰথম ইনিংছত পঞ্জাৱ কিংছ ইলেভেনে ১৯৭ ৰাণ সংগ্ৰহ কৰে৷ ইয়াৰ মূলতে আছিল পাঞ্জাৱ অপেনিং যুটীদ্বয়ৰ দুৰ্দান্ত বেটিং৷
১৯৮ ৰাণৰ লক্ষ্য লৈ দ্বিতীয় ইনিংছ আৰম্ভ কৰে ৰাজস্থান ৰয়েলছে৷ সাধাৰণতে ৰাজস্থানৰ হৈ জ’ছ বাটলাৰ আৰু য়শস্বী জয়ছোৱাল অপেনিং বেটাৰ হিচাপে নামে৷ কিন্তু বৰ্ষাপাৰাত বাটলাৰৰ পৰিৱৰ্তে জয়ছোৱালৰ স’তে অপেনিং কৰিবলৈ নামিল ৰবীচন্দ্ৰন অশ্বিন!
এগৰাকী সোঁহতীয়া অফ স্পিনাৰ হিচাপে বিশ্বজুৰি বন্দিত অশ্বিন৷ ভাৰতৰ হৈ কেইবাবাৰো দূৰ্দান্ত প্ৰদৰ্শন আৰু অভিলেখ গঢ়িবলৈ সক্ষম হৈছে তামিলনাডুৰ স্পিনাৰগৰাকী৷ বলিঙৰ সমান্তৰালভাৱে বেটিঙতো তেওঁ নিৰ্ভৰযোগ্য খেলুৱৈ৷ কিন্তু তেওঁ টি২০ মেচ অপেনিং কৰিবলৈ অহা কোনেও ইয়াৰ আগতে দেখা নাছিল৷
কিয় তেওঁক পঠোৱা হ’ল সেয়া জানিব পৰা হোৱা নাই৷ কিন্তু ৩৬ বছৰীয়া অশ্বিনৰ অপেনিং বেটাৰ হিচাপে খেলপথাৰত অৱতীৰ্ণ হোৱাৰ অভিজ্ঞতা আছে৷
জানিব পৰা মতে, ক্ৰিকেট জীৱনৰ আৰম্ভণিৰ সময়ছোৱাত ৬ ফুট ২ ইঞ্চিৰ তাৰকাগৰাকীয়ে অপেনিং বেটাৰ হিচাপে খেলিছিল৷ তদুপৰি তেওঁ মিডিয়াম পেচাৰ বলাৰো আছিল৷ কিন্তু তেওঁৰ শৈশৱৰ প্ৰশিক্ষক চি কে বিজয়ে তেওঁক এগৰাকী অপ স্পিনাৰ হিচাপে গঢ়ি তোলে৷ তাৰপাছৰখিনি সকলোৱে জানে৷ এতিয়া তেওঁ বিশ্বৰ ভিতৰতে অন্যতম আগশাৰীৰ স্পিনাৰ৷
যিহেতু ক্ৰিকেট জীৱনৰ আৰম্ভণিতে অপেনিং বেটাৰ হিচাপে তেওঁ খেলিছিল, সেয়ে বৰ্ষাপাৰাতো তেওঁক এই ভূমিকাত অৱতীৰ্ণ হ’বলৈ পঠোৱা হ’ল৷ অৱশ্যে সফল নহ’ল তেওঁ৷ চাৰিটা বল খেলি কোনো ৰাণ নকৰাকৈয়ে পেভিলিয়নমুখী হয় তেওঁ৷ অশ্বিনৰ উইকেটটো লাভ কৰে অৰ্শদীপ সিঙে৷
Continue Reading
