বয়কট কেডবেৰী! চকলেটত গোমাংস থকাৰ অভিযোগত দাবী উঠিছে কেডবেৰী বয়কট কৰাৰ

ডিজিটেল ডেস্কঃ সামাজিক মাধ্যমত এইবাৰ কেডবেৰী চকলেটক বয়কট কৰাৰ দাবী উঠিছে। চকলেটবিধত জিলেটিন হিচাপে গোমাংসৰ চৰ্বি থাকে বুলি কোৱা হৈছে। সেইবাবেই হিন্দুত্ববাদীসকলে ইয়াক বয়কটৰ দাবীত দেওবাৰে টুইটাৰত ট্ৰেণ্ডিং কৰে।

উল্লেখ্য যে শেহতীয়াকৈ বিভিন্ন চিনেমা, বিজ্ঞাপন, ব্যৱসায়িক সামগ্ৰি ইত্যাদিক বয়কট কৰাৰ দাবী উঠি আহিছে। এইসমূহে ধৰ্মীয় বিশ্বাস-পৰম্পৰা-অনুভূতিক আঘাত সনা বুলি অভিযোগ অনা হৈছে।

সামাজিক মাধ্যমত বয়কটৰ দাবীটোৰ স’তে কেডবেৰীৰ ৱেবপেজৰ এটা স্ক্ৰীণশ্বটো প্ৰচাৰ কৰা হৈছে। তাত লিখা হৈছে যে কেডবেৰীৰ দ্ৰব্যসমূহত গোমাংসৰ জিলেটিন ব্যৱহাৰ কৰা হৈছে।

তাৰপাছতে কেডবেৰীক বয়কটৰ দাবী উত্থাপন কৰা হৈছে। হিন্দুত্ববাদীসকলে সামাজিক মাধ্যমত গ্ৰাহকসকলক দেশীয় গৰুৰ গাখীৰেৰে উৎপাদিত ভাৰতীয় মিঠাই ক্ৰয় কৰিবলৈ অনুৰোধ কৰা হৈছে।

অৱশ্যে ৱেব পেজৰ এই স্ক্ৰীণশ্বটটো ব্ৰেণ্ডটোৰ অষ্ট্ৰেলিয়ান ৱেবচাইটৰহে। যোৱা বৰ্ষতো এই লৈ হিন্দুত্ববাদীসকলে কেডবেৰীক লৈ আপত্তি প্ৰদৰ্শন কৰিছিল।

আপত্তিৰ প্ৰত্যুত্তৰত কেডবেৰীয়ে কৈছিল যে ভাৰতত তেওঁলোকৰ দ্ৰব্যসমূহ এশ শতাংশ নিৰামিষ আৰু গাখীৰেৰে তৈয়াৰী। শেহতীয়াকৈ বয়কটৰ দাবী তোলাৰ পাছত ব্ৰেণ্ডটোৰ তৰফৰ পৰা কোনো বিবৃত্তি দিয়া হোৱা নাই।