ডিজিটেল ডেস্কঃ ২০২২ চনটো পাহৰিব বিচাৰে ক্ৰিষ্টিয়ানো ৰোণাল্ডোৱে। এনেকুৱা দুৰ্ভাগ্যজনক বছৰ জীৱনলৈ কাহানিও অহা নাই। কেইবাটাও বিতৰ্কত সাঙোৰ খাই পৰাৰ উপৰিও পুত্ৰ সন্তানৰো মৃত্যু হয় চলিত বৰ্ষতে। কাটাৰ বিশ্বকাপতো হতাশাৰ বলি হয় পৰ্তুগীজ তাৰকাগৰাকী।
কাটাৰ বিশ্বকাপত পৰ্তুগাল বাহিৰ হোৱাৰ পাছতে ৰোণাল্ডো গোপনে আছে। সামাজিক মাধ্যমতো তেওঁৰ কোনো নতুন আপডেট নাই। অৱশেষত ফুটবলাৰগৰাকী কেনে আছে সেয়া জনালে বান্ধৱী জৰ্জিনা ৰড্ৰিগেজে।
''ইমান কঠিন বছৰ আমাৰ জীৱনলৈ কাহানিও অহা নাছিল। সন্তানৰ মৃত্যুৰ দৰে দুখজনক ঘটনা ঘটিব পাৰে বুলি আমি দুঃস্বপ্নতো ভবা নাছিলো। মাক-দেউতাক হিচাপে চৰম কষ্ট পাইছো আমি।’’- জৰ্জিনাই এখন সংবাদপত্ৰৰ আগত কয়।
''এনেকুৱা ধৰণৰ কিছু ঘটনা আমাৰ লগত সংঘটিত হৈছে যে যিসমূহ আমি কেতিয়াও পাহৰিব নোৱাৰো।’’- ৰোণাল্ডোৰ বান্ধৱীগৰাকীয়ে কয়।
''বাস্তৱ পৰিস্থিতি সকলো সময়তে একে নাথাকে। আমি জানো যে সকলোৰে জীৱন একেধৰণৰ নহয়। জানো একাকীত্ব বা দুখৰ অনুভূতি কেনেধৰণৰ। কোনটো জয় বা কোনটো পৰাজয় সেয়া বুজি পাওঁ। হেৰুওৱাৰ যন্ত্ৰণা বুজি পাওঁ। কিন্তু জীৱনে মোক শিকাইছে যে কিধৰণে নিজকে ক্ষমা কৰিব লাগে।’’- জৰ্জিনাই কয়।
উল্লেখ্য যে বিশ্বকাপৰ আগমুহূৰ্তত ৰোণাল্ডোৱে তেওঁৰ ক্লাব মানচেষ্টাৰ ইউনাইটেডৰ স’তেও সংঘাতত লিপ্ত হৈ পৰিছিল। তাৰপাছতে বিশ্বকাপতো হতাশাজনক প্ৰদৰ্শন আগবঢ়াইছিল তাৰকাগৰাকীয়ে। যাৰ ফলত পৰ্তুগালৰ প্ৰশিক্ষকৰ স’তেও মতবিৰোধ ঘটিছিল।
Continue Reading
