ডিজিটেল ডেস্কঃ বৃদ্ধাৱস্থা মানেই ৰোগৰ আক্ৰমণ৷ আপাততঃ তেনে এটা ধাৰণাই সকলোৰে মনত ক্ৰিয়া কৰে ৷ কিন্তু আমেৰিকা যুক্তৰাষ্ট্ৰৰ কেলিফৰ্ণিয়াৰ বাসিন্দা থেৰেছা মূৰে প্ৰমাণ কৰিছে যে ১০০ বছৰ বয়সৰ পিছতো ৰোগে বহুতকে একো কৰিব নোৱাৰে৷ সঠিক জীৱনশৈলী মানি চলা সকলৰ পৰা ৰোগ সদায় দূৰে দূৰে থাকে৷ থেৰেছাৰ বৰ্তমান বয়স ১০৩ বছৰ। বয়স তেওঁ সুস্থ হৈ থকাৰ ক্ষেত্ৰত বাধা হৈ পৰা নাই।
ইয়াৰ পৰিৱৰ্তে তেওঁ ফিটনেছৰ দৌৰত বহু যুৱক-যুৱতীতকৈ আগত আছে।এক কথাত ক’বলৈ গ’লে টেৰেছাৰ বয়সত বহুতে এনেদৰে জীৱন উদযাপন কৰা সহজ কথা নহয়। টেৰেছাই তেওঁৰ জীৱনৰ শেষ দিনলৈকে ফিট হৈ থাকিব বিচাৰে। নিজৰ ফিটনেছৰ বিষয়ে উল্লেখ কৰি থেৰেছাই কয় যে তেওঁ সপ্তাহত চাৰিদিন স্থানীয় জিমলৈ যায়। তাত তেওঁ যথেষ্ট সময় কটায়। জিমত তেওঁ ওজন দঙাৰ পৰা আৰম্ভ কৰি স্কোয়াটলৈকে সকলো কৰে। সপ্তাহটোৰ বাকী সময়খিনি তেওঁ ঘৰতে খোজ কাঢ়ে। তেওঁ ব্যায়াম কৰাৰ বাবে কিছু সঁজুলিও ঘৰত ৰাখিছে।থেৰেছাৰ মতে ব্যায়াম কৰাৰ অভ্যাসেতেোঁক স্বাস্থ্যৱান হৈ থকাত সহায় কৰিছে। তেওঁৰ মতে ব্যায়ামে মানুহৰ ইমিউনিটি বৃদ্ধি কৰে৷ ৰোগ প্ৰতিৰোধ ক্ষমতা বৃদ্ধি হৈ থাকিলে ৰোগে সহজে আক্ৰমণ কৰিব নোৱাৰে৷
থেৰেছাই কেৱল ব্যায়াম কৰাই নহয়, পোছাক পাতিও ধুনীয়াকৈ পৰিধান কৰি ভালপায়। যিকোনো ঠাইলৈ যোৱাৰ আগতে তেওঁক মেক আপ কৰিবলৈ কেইবাঘণ্টাও সময় লাগে। আনকি মেকআপ কৰাৰ পিছতো পোছাকৰ সৈতে খাপ খোৱা গহনা বাছনি কৰিবলৈও আৰু কিছু সময় লয়। এই বয়সতো তেওঁ অকলে চিনেমা উপভোগ কৰিবলৈ যায়৷ থেৰেছাই কয় "বহুলোকে মোক সতৰ্ক কৰি দিছে, আপুনি এই বয়সত অলপ সাৱধান হোৱা উচিত। কিন্তু মই তেনেকৈ কথাবোৰ নাভাবো। কিয়নো যদি আপুনি হৃদয়ৰ পৰা সুখী হয়,তেন্তে চিন্তা কৰিবলগীয়া কথা একো নাথাকে৷ মানুহে সদায় ইতিবাচক চিন্তা কৰিব লাগে, ইতিবাচক কথা ক’ব আৰু ইতিবাচক কাম কৰিব লাগে৷ মই কোনো ঔষধ গ্ৰহণ নকৰো। মই আনকি চিকিৎসকৰ ওচৰলৈও নাযাওঁ। মই সদায় নিজকে সৎচিন্তাৰে সুখী কৰি ৰাখিবলৈ চেষ্টা কৰোঁ। এয়াই মোৰ সুস্থতাৰ একমাত্ৰ ৰহস্য। ''
