কাছাৰৰ কালাইনত সামান্য পাৰ্কিঙক লৈ ৰক্তাক্ত সংঘৰ্ষ! আহত ৫

ডিজিটেল ডেস্ক: সামান্য বাহন পাৰ্কিঙক কেন্দ্ৰ কৰি কাছাৰৰ কালাইনত তীব্ৰ উত্তেজনাৰ সৃষ্টি। তুচ্ছ বিবাদ মুহূর্ততে নৃশংস আক্ৰমণলৈ ৰূপ লয়। প্ৰথমে পথত এজন ট্ৰাকচালকক প্ৰহাৰ কৰা হয় আৰু পিছলৈ চিকিৎসালয়ত সোমাই তেওঁৰ পৰিয়ালৰ সদস্যসকলৰ ওপৰত ধাৰ থকা অস্ত্ৰ আৰু লোহাৰ ৰডেৰে পুনৰ আক্ৰমণ চলোৱা ঘটনাই সমগ্ৰ অঞ্চলটোত চাঞ্চল্যৰ সৃষ্টি কৰিছে। 

ঘটনাৰ সূত্ৰপাত ঘটে দুপৰীয়া কালাইন কলেজ ৰোডত। নিজৰ ট্ৰাক পাৰ্কিং কৰাৰ সময় স্থানীয় বাসিন্দা তথা পেছাত ট্ৰাকচালক জয়দীপ দাসৰ বাহনৰ সৈতে এখন হুণ্ডাই ভেন্যু গাড়ীৰ সামান্য সংঘৰ্ষ হয়। প্ৰত্যক্ষদৰ্শীৰ দাবী অনুসৰি গাড়ীখনত বিশেষ ক্ষতি নোহোৱা স্বত্বেও চালকজন ক্ষুণ্ণ হৈ জয়দীপক ট্ৰাকৰ পৰা নমাই প্ৰচণ্ড প্ৰহাৰ কৰে। সম্পূৰ্ণ ঘটনাটো চিচিটিভি ফুটেজত ধৰা পৰে।

আহত জয়দীপক লৈ পৰিয়ালৰ সদস্যসকলে থানালৈ গৈছিল যদিও আৰক্ষীয়ে প্ৰথমে চিকিৎসাৰ পৰামৰ্শ দিয়ে। কিন্তু তাৰ পিছতেই পৰিস্থিতিয়ে ভয়ংকৰ ৰূপ লয়। অভিযোগ অনুসৰি, পূৰ্বৰ আক্রোশত অভিযুক্ত চালকজনে কেইজনমান যুবকক লগত লৈ চিকিৎসালয়ত উপস্থিত হৈ জয়দীপসহ তেওঁৰ পৰিয়ালৰ মুঠ পাঁচজন লোকৰ ওপৰত অতৰ্কিতে আক্ৰমণ চলায়। অস্ত্ৰ আৰু লোহাৰ ৰডৰ আঘাতত তিনিজন গুৰুতৰভাৱে আহত হয়। এজন গুৰুতৰভাৱে আহতক উন্নত চিকিৎসাৰ বাবে শিলচৰ মেডিকেল কলেজ আৰু হাস্পাতাললৈ প্ৰেৰণ কৰা হৈছে।

দিনতে চিকিৎসালয়ত সোমাই এই ধৰণৰ আক্ৰমণ সংঘটিত হোৱাত অঞ্চলজুৰি তীব্ৰ ক্ষোভৰ সৃষ্টি হৈছে। আৰক্ষীয়ে অভিযুক্তসকলক চিনাক্ত কৰি গোচৰ ৰুজু কৰিছে আৰু শীঘ্ৰে গ্ৰেপ্তাৰৰ আশ্বাস দিছে।

প্ৰত্যক্ষদৰ্শীৰ মতে, সামান্য পাৰ্কিং বিতৰ্কক কেন্দ্ৰ কৰি সৃষ্টি হোৱা এনেধৰণৰ হিংসা সমাজৰ সম্প্ৰীতিৰ বাবে অত্যন্ত উদ্বেগজনক আৰু নিন্দনীয়।