ডিজিটেল ডেস্কঃ নিজৰ বন্ধুকে অপহৰণ কৰি ধনদাবী কৰিলে এজন যুৱকে। চাঞ্চল্যকৰ এই ঘটনাটো সংঘটিত হৈছে উত্তৰপ্ৰদেশৰ প্ৰয়াগৰাজত। জানিব পৰা মতে, সৰ্বেশ পটেল নামৰ এজন যুৱকে তেওঁৰ বন্ধু বাসু সিঙক ধনদাবীৰ উদ্দেশ্যে অপহৰণ কৰে। তাৰপাছতে জালত পৰে আৰক্ষীৰ।
আৰক্ষীয়ে জনোৱামতে, অনলাইন গেম খেলিবলৈ বেংকৰ পৰা লাখ লাখ টকাৰ ঋণ লৈছিল সৰ্বেশে। কিন্তু সেয়া পৰিশোধ কৰিবলৈ সক্ষম হোৱা নাই। সেয়ে নিজৰ বন্ধুকে অপহৰণ কৰাৰ সিদ্ধান্ত লয়।
তেওঁৰ বন্ধু বাসু সিং এগৰাকী চহকী উদ্যোগতিৰ সন্তান। সেয়ে বন্ধুক অপহৰণ কৰি মোটা টকাৰ দাবী কৰিলে পোৱা যাব বুলি তেওঁ পৰিকল্পনা কৰিছিল। দাবী কৰিছিল ২০ লাখ টকাৰ।
বন্ধুৰ ঘৰলৈও সৰ্বেশে ফোন কৰিছিল বুলি অভিযোগ উঠিছে। জনাইছিল যে মুক্তিপণৰ দাবী নাপালে বাসু সিঙক হত্যা কৰা হ’ব। ফোনকল লাভ কৰিয়ে আৰক্ষীৰ দ্বাৰস্থ হয় বাসু সিঙৰ অভিভাৱক। ধুমনগঞ্জ থানাত এজাহাৰ দাখিল কৰে। তাৰপাছতে সৰ্বেশক গ্ৰেপ্তাৰ কৰা হয়।
গ্ৰেপ্তাৰৰ পাছতে সৰ্বেশে সকলো স্বীকাৰ কৰে। সমগ্ৰ পৰিকল্পনাটোত সৰ্বেশৰ সংগী হৈছিল আন দুজন যুৱক। সম্প্ৰতি তেওঁলোকৰ সন্ধানত নামিছে আৰক্ষী।
Continue Reading
