ডিজিটেল ডেস্কঃ লিয়নেল মেছিয়ে আৰ্জেণ্টিনাৰ হৈ প্ৰদৰ্শনীমূলক মেচ খেলিবলৈ চীন দেশলৈ গৈছিল। কিন্তু দেশখনত প্ৰৱেশ কৰাৰ পূৰ্বে বিশ্বকাপ বিজয়ী ফুটবলাৰগৰাকীক বিমানবন্দৰত আটক কৰা হয়। শেহতীয়াকৈ এই খবৰ পোহৰলৈ আহিছে। কোৱা হয় যে তেওঁ পাছপ’ৰ্ট আনিবলৈ পাহৰি যোৱাৰ বাবেই এই কাণ্ড ঘটে। কিন্তু ৩০ মিনিটতে মীমাংসা হয়।
১৫ জুনত বেইজিঙত অষ্ট্ৰেলিয়াৰ বিৰুদ্ধে আৰ্জেণ্টিনাৰ প্ৰদৰ্শনীমূলক মেচ আছে। সেই মেচ খেলিবলৈ ১০ জুনত বেইজিং বিমানবন্দৰত অৱতৰণ কৰে মেছিয়ে। তাতেই তেওঁক চীনৰ সীমান্ত আৰক্ষীয়ে আটক কৰে।
স্থানীয় সংবাদ মাধ্যমৰ মতে, মেছিয়ে আৰ্জেণ্টিনাৰ পাছপ’ৰ্টৰ সলনি স্পেনিছ পাছপ’ৰ্ট লৈ চীনলৈ আহিছিল। স্পেইনৰ পাছপ’ৰ্টত চীনত থাকিবলৈ ভিছা নাছিল। ৩০ মিনিটৰ পিছত সমস্যাটো সমাধান হয়। মেছিয়ে বিমানবন্দৰৰ পৰা ওলাই হোটেললৈ ৰাওনা হয়।
ছ’চিয়েল মিডিয়াত ভাইৰেল হৈ পৰিছে ঘটনাটোৰ এটা ভিডিঅ’ ক্লিপ, য’ত দেখা গৈছে যে মেছিয়ে পাছপ’ৰ্ট লৈ আৰু সহযোগী ফুটবলাৰৰ সৈতে কথা পাতিছে। তেওঁৰ চাৰিওফালে চীনৰ আৰক্ষী বাহিনী থিয় হৈ আছিল।
১৫ জুনত অষ্ট্ৰেলিয়াৰ বিৰুদ্ধে খেলাৰ পাছত আৰ্জেণ্টিনাই ইণ্ডোনেছিয়াৰ বিৰুদ্ধে খেলিব। সেই মেচখন ১৯ জুনত জাকাৰ্টাত অনুষ্ঠিত হোৱাৰ কথা।
Continue Reading
