ডিজিটেল ডেস্কঃ “চীনত প্ৰতি মিনিটত দহটা শিশু জন্ম হয়। ইয়াৰ বিপৰীতে ভাৰতত প্ৰতি মিনিটত ৩০ টাকৈ শিশুৰ জন্ম হয়। তেনেস্থলত চীনৰ স’তে আমি কেনেকৈ প্ৰতিদ্বন্দিতা কৰিব পাৰিম?”- এই ভাষ্য প্ৰদান কৰিছে কেন্দ্ৰীয় গ্ৰাম্য উন্নয়ন মন্ত্ৰী গিৰিৰাজ সিঙে।
জনসংখ্যা নিয়ন্ত্ৰণ বিলৰ ওপৰত গুৰুত্ব প্ৰদান কৰি দেওবাৰে সিঙে কয় যে যিহেতু দেশৰ সম্পদ সীমাৱদ্ধ, সেয়েহে জনসংখ্যা নিয়ন্ত্ৰণ কৰাটো অত্যন্ত প্ৰয়োজনীয়।
এইক্ষেত্ৰত তেওঁ চীনৰ উদাহৰণ দাঙি ধৰে। কয় যে চীনে ১৯৭৯ চনৰ পৰা ‘এটা শিশুৰ নীতি’ প্ৰয়োগ কৰি উন্নয়নৰ জখলাত আগবাঢ়িছে।
উল্লেখ্য যে জনসংখ্যা নিয়ন্ত্ৰণ বিলক লৈ মাজে সময়ে দেশৰ ৰাজনীতিত চৰ্চা চলি আহিছে। বহুতো বিজেপি নেতাই বিলখনৰ সমৰ্থনত থিয় দি আহিছে।
চলিত বৰ্ষৰ আগষ্ট মাহত কেন্দ্ৰৰ স্বাস্থ্য মন্ত্ৰালয়ে কৈছিল যে বিলখন সন্দৰ্ভত এতিয়ালৈকে কোনো সিদ্ধান্ত লোৱা হোৱা নাই।
“ধৰ্ম-বিভাজন নিৰ্বিশেষে জনসংখ্যা নিয়ন্ত্ৰণ বিলখন প্ৰয়োগ কৰিব লাগে আৰু যিসকলে ইয়াক নামানে তেওঁলোকক চৰকাৰী সুবিধাসমূহ প্ৰদান কৰাৰ পৰা বিৰত থাকিব লাগে। তেওঁলোকৰ ভোটদানৰ অধিকাৰো কাঢ়ি ল’ব লাগে।”- গিৰিৰাজ সিঙে কয়।
Continue Reading
