ডিজিটেল ডেস্কঃ মাছৰ বৰষুণ হোৱাৰ কথা বিভিন্ন সময়ত চৰ্চালৈ আহি আছে যদিও চীনত এইবাৰ হৈছে পোক-পতংগৰ বৰষুণ! এনে বৰষুণৰ ফলত চীনৰ ৰাস্তাত ৰখাই থোৱা গাড়ীবোৰ সম্পূৰ্ণৰূপে পোক-পতংগৰে আবৃত হৈ পৰিছে৷ আনহাতে ৰাস্তাত কিলবিলাই ফুৰিছে পোক-পতংগই। এনে ঘটনাৰ পিছতে বেইজিঙৰ নাগৰিকসকলক ছাতি লৈ ঘৰৰ পৰা ওলাই যাবলৈ পৰামৰ্শ দিয়া হৈছে। চীনৰ ৰাজধানী বেইজিঙত এনে ধৰণৰ বৰষুণ হৈছে বুলি খবৰ আহিছে। যিসকলে এনে বৰষুণ দেখিছে তেওঁলোক আচৰিত হৈ পৰিছে৷
আকাশৰ পৰা বৰষুণৰ দৰে পৰি থকা পোক-পতংগৰ ভিডিঅ' এটা ভাইৰেল হৈ পৰিছে৷ প্ৰাগ নিউজ ডিজিটেলে অৱশ্যে ভিডিঅ’টোৰ সত্য-সত্যতা নিৰূপন কৰা নাই৷ বহু লোকে ছ'চিয়েল মিডিয়াত এই ভিডিঅ’ শ্বেয়াৰ কৰিছে। ইয়াৰ লগতে মানুহে এই ৰহস্যজনক বৰষুণকলৈ বিভিন্ন ধৰণে প্ৰতিক্ৰিয়া প্ৰকাশ কৰিছে। সংবাদ মাধ্যমৰ বাতৰি অনুসৰি, ৰাজধানী চহৰ খনৰ বিভিন্ন অঞ্চলত পোক -পৰুৱা বৰষুণ হৈ আছে।
ছ'চিয়েল মিডিয়াত ভাইৰেল হৈ থকা ভিডিঅ' আৰু ফটোবোৰত দেখা গৈছে যে ৰাস্তাত ৰখাই থোৱা গাড়ীবোৰ সম্পূৰ্ণৰূপে পোক-পতংগৰে আবৃত হৈ পৰিছে।বেইজিঙৰ বাসিন্দাসকলক অপ্ৰয়োজনীয়ভাৱে ঘৰৰ পৰা ওলাই নাযাবলৈও কোৱা হৈছে বুলি সংবাদমাধ্যমৰ বাতৰিত প্ৰকাশ৷
বহুতে এইবুলিও দাবী কৰিছে যে সেইবোৰ পোক-পতংগ নহয়, চীনত পোৱা পপলাৰ ফুলহে। এনে ফুল পোক-পতংগৰ দৰেই দেখা যায়। একে সময়তে, কিছুমান লোকে কৈছে যে এই পতংগবোৰ তীব্ৰ বতাহে ক’ৰবাৰ পৰা উৰুৱাই আনিছে আৰু সেয়াই বৰষুণৰ দৰে তললৈ সৰি পৰিছে৷একাংশ বিশেষজ্ঞই কৈছে যে তীব্ৰ ধুমুহাৰ সৈতে এনে পোক-পতংগৰ আগমন নতুন কথা নহয়। ঘটনাটোকলৈ আচৰিত হোৱাৰ কোনো প্ৰয়োজন নাই। আগতে, আকাশৰ পৰা মাছৰ বৰষুণৰ হোৱাৰ বহু ঘটনা ঘটিছে৷ বহু বিশেষজ্ঞৰ মতে এইক্ষেত্ৰত সাগৰৰ মাছৰ বিশাল জাক একোটা প্ৰচণ্ড বতাহে ওপৰলৈ তুলি নিয়ে আৰু সেই বৰষুণৰ ৰূপত ধৰালৈ নামি আহে৷
Continue Reading
