ডিজিটেল ডেস্কঃ অনুৰ্ধ-১৯ টি-২০ বিশ্বকাপত ভাৰতৰ শেফালী বাৰ্মাৰ দলে জিলিকি উঠাৰ পিছত এইবাৰ ফুটবলৰ ক্ষেত্ৰত দেশৰ মহিলা দলটো জিলিকি উঠিল। এক কথাত ক’বলৈ গ’লে ক্ৰিকেটৰ লগতে ভাৰতৰ ছোৱালীয়ে ফুটবলতো আধিপত্য বিস্তাৰ কৰিবলৈ সক্ষম হৈছে । শুকুৰবাৰে অনুৰ্ধ-২০ ছাফ কাপত ভূটানৰ বিৰুদ্ধে ভাৰতৰ ছোৱালীৰ দলটোৱে ১২ টা গ'ল কৰে।
বাংলাদেশৰ ৰাজধানী ঢাকাত অনুষ্ঠিত প্ৰতিযোগিতাখনৰ প্ৰথমখন খেলত ভাৰতে ভূটানক ১২-০ গ'লত পৰাস্ত কৰে। তিনিগৰাকী ভাৰতীয় ফুটবলাৰে হেট্ৰিক অৰ্জন কৰিছিল। প্ৰথম খেল হোৱাৰ বাবেই ভাৰতে আৰম্ভনিৰে পৰাই সতৰ্কতাৰে খেলিবলৈ আৰম্ভ কৰিছিল। খেলৰ ২৯ মিনিটত দলটোৰ হৈ প্ৰথমটো গ'ল কৰে অপৰ্ণা নাৰ্জাৰীয়ে।
ভাৰতে ৩৬ মিনিটত তেওঁৰ দ্বিতীয়টো গ'লৰ দ্বাৰা ব্যৱধান বৃদ্ধি কৰে। দলটোৰ তৃতীয়টো গ'ল ৪৩ মিনিটত নীতু লিণ্ডাৰ ভৰিৰ পৰা বাগৰি আহে৷ প্ৰথমাৰ্ধত ৪-০ ত আগবাঢ়ি থকা ভাৰতীয় দলটোক দ্বিতীয়াৰ্ধত অধিক আত্মবিশ্বাসী দেখা গৈছিল। ভাৰতৰ অনুৰ্ধ-২০ মহিলা ফুটবলাৰসকলে ভূটানৰ দলটোক সকলো পিনৰ পৰাই বান্ধি পেলাইছিল৷ খেলৰ ৯০ মিনিটত দলটোৰ দ্বাদশ গ'লটো নেহাই দিয়ে। ভাৰতীয় দলৰ আক্ৰমণৰ সন্মুখত ভূটানৰ প্ৰতিৰক্ষা সম্পূৰ্ণ ৰূপে তছনছ হৈ পৰে৷
Continue Reading
